Sabîh-i lücce-i gufrân-ı Hayy u Kayyûm olan Hudâvendigâr-ı merhûm hazretlerinin benât-ı ʻismet-simâtlarından Esmâ Sultân-ı sâmî-mekân hazretlerinin zîb-ârâ-yı hacele-gâh-ı ʻarûs olacakları evkāt-ı idrâk edüp, dâyire-i fâhire-i Mülûkâne'de neşv ü nemâ bulmuş bir vezîr-i sütûde-tedbîre ʻakd u tezvîci murâd-ı hümâyûn olmağla, Kapudan-ı deryâ Vezîr Hüseyin Paşa bu ʻakīle-i girân-kadre lâyık u müste'hill görülüp, Darü's-saʻâde Ağası Sultân-ı müşârun ileyhâ hazretleri tarafından ve Kethudâ-yı hazret-i Vâlide Sultân Yûsuf Ağa, Vezîr-i müşârun ileyh tarafından nâmzed-i vekâlet olmağla, Defter-i Teşrîfât'da mukayyed ü merkūm ve kân-ı imkânda [136a] nazîri nâ-yâb u maʻdûm, nişân tākımı irsâlinden sonra Darü's-saʻâde ağalarına mahsûs olan odada bir meclis-i hatîr ʻakd olunup, bizzât Şeyhulislâm ve ʻallâmetü'l-enâm Efendi mihr-i maʻlûm ile ʻakd-ı râbıta-i nikâh olup, muʻtâd üzere müşârun ileyhe ilbâs-ı ferve-i semmû ve sâyirler dahi hilaʻ-i zâhire telebbüsü ile mesrûr oldular.