Sadriaʻzam zîb-ârâ-yı mesned-i vekâlet-i kübrâ ve bi'l-istikbâl nâm-zed-i rü'yet-i umûr-ı memâlik ü enhâ olduğuna binâʼen, mesâlih-i nâsa mübâşeret ve vüzerâ-yı 'izâmın taʻdîl ü tesviyye-i menâsıblarıyla hâllerine riʻâyet buyurup, gurre-i Zilka‘ide'de Kapudan-ı sabık Hüseyin Paşa'yı Girid Eyâleti ile tevkīr ve Çavuş-zâde Vezîr 'Abdullah Paşa'yı Kirmân Eyâleti ile şabaş-hân-ı dîvân-ı hatîr edüp, Köstendil Sancağı'yla müstehakk-ı eşedd-i nekâl olan Karahisârî Ahmed Paşa'yı tezlîl ve Hâniye Sancağı'yla ‘Azm-zâde ‘Abdullah Paşa'yı tebcîl ve İçil Sancağı'nı kayd-ı esrden rehyâb olan Arslan Paşa'ya ferîse-i meʻâş ve Niğde Sancağı Koca ‘Abdî Paşa Kethudâsı Kara Mehmed Paşa'ya vesîle-i inti‘âş eylediklerinden gayri, sâyir eyâlât u elviyeyi ashâbına ibkā ve Diyârbekir Vâlîsi olan Ferhâd Paşa'yı Hotin muhafazasına isrâ eyledi. Ordu-yi hümâyûn ile Asitâne'ye vârid olan ‘Arab-zâde Ahmed Ağa ‘akil u müdebbir ve her hâlin encâmını mütefekkir bir şahs-ı behâdır olup, bekāsında Devlet-i ‘aliyye'ye hıdmet-i nâfi a zuhûru melhûz iken, ordulu olmak takrîbi ile vücûdu istiskāl ve lüzûm-ı ‘azli maʻrûz-ı Dergâh-ı felek-misâl kılınup, Ağa-yı mûmâ ileyh şehr-i mezkûrun dördüncü günü der-i devlet'den matrûd ve hâlâ Segbân-başı olan Yazıcı-yı [137a] esbak Sa'îd Ağa ağalık merkezinde sâbitü'l-vücûd olup, Segbân-başılık ile Sâlih Ağa kâm-revâ oldu. Sadr-ı esbak Hasan Paşa Vezîriaʻzam hazretlerinin Kethudâlık hıdmetlerinde bir müddet muntasıb u kāyim ve sâlife-i hukūk ile zuhûr-ı ‘inâyetlerine muntazırr u mülâzım olmuşidi. Îfâ-yı lâzıme-i mürüvvet kasdıyla hakkında derîce-bâz- niyâz olup, Silistre Eyâleti ile tatrîb ve selefi Vezîr Ahmed Paşa'yı Çirmen Sancağı'yla tatyîb eyledi. Kayd-ı esr ile vatanlarından dûr ve fakr u fâka ile dîdâr-ı dünyâdan mehcûr olan zuʻafâ-yı sügūr serseri-geşt-i esvâk ve dûr oldukları maʻlûm-ı Şehriyâr-ı merâhim-nüşûr olduğuna binâ'en, haklarında merhamet ü şefekat-i Mülûkâne bedîdâr olup, birer mikdâr harclık ihsânıyla rû-be-râh-ı dâr u diyâr oldular.