Anapa yurdu levâhık u tevâbiʻiyle Rûsiyyelü'den nezʻ ü istihlâs olunduğu takrîbi ile ber-hemzede-i indirâs olan mahalline müceddeden vazʻ-ı esâs ve kalʻa binâsıyla lede'l-hâce mazarrat ve keyd-i aʻdâdan ihtirâs olunmak levâzım-ı hazm u ihtiyâtdan olmağla, Dergâh-ı ʻâlî kapucu-başılarından Nüz[û]l Emîni sâbık Burgaslı Mustafâ Ağa, [134a] Binâ Emîni nasb olunduğundan gayri, "el-kiyâsetü fî'l-kevseci" me'âline mâ-sadak olup, Akdeniz Başbuğluğu hengâmında behâdırlığı müşâhede olunan Mîr-i mîrân Mustafâ Paşa muhâfız taʻyîn ve masârif-i zarûriyyesine medâr olmak üzere Ankara Sancağı tevcîhi ile kâm-bîn kılınup, ʻan-nakdin yigirmi bin guruş ihsânıyla dahi şedâyid-i me'mûriyyeti tehvîn olundu. Kezâlik Belgrad Kalʻası'nın istîla hasebiyle baʻzı mahalleri münhedim ve Paşa ve Ağa Kapusu bi'l-külliyye münʻadim olup, müceddeden binâsı lâzım ve taʻmîri mühimm olan mahallerin fî-akrabi'l-vakt tesviyyesiyçün kâr-güzâr ve mukaddem bir şahsın taʻyîni iktizâ etmekle sâbıkā Arpa Emîni olan Memiş Efendi hıdmet-i mühimme-i mezkûrenin temşiyyetine me'mûr ve sekiz bin guruş harcırâh ve müddet-i ikâmetinde mûceb-i refâh olmak üzere yevmiyye yigirmi beş guruş meʻâş ihtisâsıyla hâtırı mecbûr kılındı.