Çünki Ordu-yi hümâyun'un [131a] Edirne'den hareketi ve Âsitâne tarafına teveccüh ü 'azîmeti irâde-i hümâyûn buyurulmuşidi. Evâhir-i şehr-i Recebü'l-mücerreb'de kānûn-ı Devlet-i ebed-müddet üzere piyâde ‘askeri pîşvâ-yı livâ-yı şerîf ve Sadrıa'zam dahi redîf olarak Şa'bânü'l-mu'azzam'ın dokuzuncu günü Küçükçekmece ile İncirli miyânında vâki‘ Uzunköprü sahrâsına darb-ı hıyâm ve ferdâsı İncirli sahrâsına nasb olunan çadırlarda teneffüs ü ârâm olunup, tertîb olunan alay-ı dil-ârâ ile hareket ve Dâvud Paşa ile İncirli arasında râkidü'l-hayl-i meydân-ı übehhet ü sürûru, nâşirü'l-‘adl-i memâlik-i İslâm-perveri mu‘addelü'l-nehâr-ı âsumân-ı ‘azamet ü bahtiyârî ve mıntıkatü'l-burûc-i eflâk-ı saltanat u kâm-kârî olan Şehriyâr-ı bülend-menzilet ve Livâ’-i şerîfi ber-vech-i taʻzîm ü ibcâl istikbâl buyurup, Dâvud Paşa Serâyı'nı makdem-i hümâyûnlarıyla reşk-i irem ve mahall-i mezkûrda merreten ba'de-uhrâ Serdâr-ı ekrem'i şeref-i muhâtabât ve mu‘tâd olan iltifât ü teşrîfât ile dil-şâd ü hürrem etdikden sonra, Dâvud Paşa'dan süvâr-ı semend-i Devlet ve dâyire-i fâhire-i Şâhâneleriyle Serây-ı bihişt-âsâlarına ‘avdet ve Sadrıaʻzam dahi Livâ'-i şerîfi alup, tertîb-i maʻlûm üzere Serây-ı hümâyûn'a yeden-bi-yedin Livâ'-i şerîf'i müsellem-i dest-i Şehriyâr-ı ‘azîzü'l-vücûd eylediğine müteʻâkib, Paşakapusu'na ‘âyid ü âyib olup, Dîvân yerinde lâzım gelenlere 'umûm hilʻatini iksâ ve baʻdehû bâliş-i rez-târ istirâhate ittikâ eyledi.