Müşârun Kütahya Eyâleti'nde vâki Çakallı ‘aşîretinden bir fırkaya zâbit iken, sefer-i sâbıkda Kapucu-başılık ile kesb-i taʻyîn ü iştihâr ve hitâm-ı seferde mütemekkin olduğu mahalle gelüp, Anadolu vâlîleriyle vakt-be-vakt muʻâraza vü muhâvereye ictisâr eylediğinden hakkında emr-i âlî ısdâr olunmuşidi. Bir takrîb varta-i mezkûreden tahlîs-i nefs edüp, işbu sefer vukūʻunda Mîr-i mîrânlık ile Üsküdar'a vürûd eyledikde alayını temâşâ edenler vezârete ehil olduğunu sevk ü taʻrîf ve kendi dahi levendâne etvâr sâhibi bir merd-i zarîf olup, darb-ı nutk ile baʻzı kimseleri teshîr ve garaz-ı aslîsini husûl-pezîr edüp, nâyil-i vezâret ve mazhar-ı nevaziş ü rağbet olmuşidi. Seferlerde bi-hikmetillâhi Teʻâlâ katʻâ bir hıdmete yaramayup, meʼmûr olduğu mahalleri taht ü târâc ve fukarâ-yı etrâf vu eknâfı izʻâc eylediği mesmûʻ-ı Şehriyârî olmağla, sâdır olan emr-i hümâyûn mûcebince katl ü iʻdâm ve mazarrat u hasâretinden tahlîs-i enâm olundu.