Nâzır-ı Evkāf-ı Haremeyn ve mütevellî-yi umûr-ı bukʻateyn-i mübareketeyn olan Darü's-saʻâde Ağası [130a] Bilâl Ağa bir müddetden berü mübtelâ-yı maraz-ı müdhiş ve ser-nihâde-i bâlîn-i renc-i muvahhiş olup, [mısra]: Ez-kazâ iskencebîn-i safra füzûd. mefhûmu üzere müdâvât-ı etıbbâ kar-ger-i maksûd ve sebeb-i sıhhat-i vücûd olmadığına binâʼen bu esnâda Ağa-yı mûmâ ileyh lebbeyk-zen-i duʻâ-yı ecel-i mevʻûd ve ‘âzim-i sû-yı rahmet-i Rabb-i Vedûd oldu. Hâlâ Hazîne-dâr-ı hazret-i Şehriyârî olan Hâlid Ağa'da o makām vâcibü'l-ihtirâma ehliyyet ü istihkāk zâhir olmağla, huzûr-ı meʻâlî-nüşûr-ı Mülûkâne'de telebbüs-i ferve-i semmûru ile nâyil-i etemm-i sürûr ve nezâret-i umûr-ı Haremeyn şerefini ihrâz ile hâyiz-i akse'l-gāye-i hubûr oldu.