İntihâ-yı hudûd-ı Mısriyye'de vâki şu‘ûb-1 Sinnâriyye'den Fûr nâm memleketin hâkimi olan Mevlâ ‘Abdurrahman'ın Der-bâr-ı 'atûfet-medâr'a bir kıt'a ‘arîzası ve be-hükm-i [mısra]: İnne'l-hedâyâ 'alâ mikdâri mehdîhâ. dört nefer tavâşî ile bir mikdâr temr-i Hindî hediyyesi vârid olup, ‘arîzası Mısr-ı mahrûse'de resm-i üserâ alınmamak husûsundan 'ibâret olmağla, mûsel-i hediyye olanlara cânib-i mîrîden mikdâr-ı kifâye taʻyînât i'tâ ve huzûr-ı Sadru's-sudûr'da hil'atleri iksâ olundukdan sonra, Mısır Vâlîsi vezîre istidʻâları üzere emr-i ‘âlî ısdâr ve Hâkim-i mûmâ ileyh ve hükümrân olduğu kabâyil mezheb-i İmâm Mâlik'i ihtiyâr etmiş bulunduklarından, cihet-i vahdet-i İslâmiyye muktezâsı üzere haklarında afitâb-ı ‘avârıf-ı Hüsrevâne-i lem‘a-bisâr olmağla, Hâkim-i mûmâ ileyhe bir kıt‘a dâvudî zere ve etrâfı hurde elmâs ile masnû bir kıt‘a la‘l-i hâtim ve bir kabza mutallâ seyf ve Selânik-kârî bir ‘aded seccâde ve beş ‘aded Uşşak seccâdesi ve sûfe kaplı bir top kākım kürk ihsân olunup, cevâb-nâmesiyle [130b] âdemleri dahi mazhar-ı in‘âm u rağbet oldukları hâlde cânib-i Kāhire-i ma‘ziyye'ye imâle-i sükkân-ı ‘azîmet eylediler.