Mâh-ı Recebü'l-ferd'in yigirminci Salı günü sunûf-ı ʻaskeriyyenin bir kıst mevâcibleri ihrâc olunup, Edirne Serâyı'nda tevzîʻ ü taksîm ve birkaç gün zarfında devr ü tetmîm olunduğu maʻrûz-ı ʻatebe-i Şehriyâr-ı heft-iklîm olunduğuna binâ'en, Hazînedâr-ı hazret-i Şehriyârî Hâlid Ağa vesâtatıyla Sadriaʻzam tarafına teşrîfât-ı hümâyûn gönderilüp, Ağa-yı mûmâ ileyh Edirne'ye vusûl buldukda tertîb-i Dîvân-ı bülend-erkân kılınup, teşrîfât-ı seniyye hatavât-i tebcîl ile istikbâl ve hatt-ı hümâyûn kırâ'at olunup, erbâb-ı Dîvân duʻâ-yı bekā-yı ʻömr ve ikbâl-i Şâhâne'yi eyvân-ı Keyvân'a îsâl eylediler. Ağa-yı müşârun ileyh ikrâm-ı kâmil ile Âsitâne-i saʻâdet'e vâsıl ve tevzîʻ-i mevâcibe ʻilm-i Şâhâne şâmil olmağla, Ordu-yi hümâyûn'un ʻavdetine irâde-i hümâyûn teʻalluk edüp, sâdır olan hatt-ı kerâmet-sutûr ile Ağa-yı müşârun ileyh tekrar me'mûr oldu.