Zemân-ı tufûliyet ve 'ahd-ı şebâb u civânîden berü perverde-i iksîr-i isr-i hazret-i Tâcdârî olan Hüseyin Ağa nuhustîn-i sâl-i ferruh-fâl-ı cülûs-ı hümâyûnda Baş-çukadârlık hıdmet-i müstevcibü'ş-şerefini ihrâz ile hâyiz-i kasbü's-sebak-ı iʻtibâr u imtiyaz olmuşidi. Müşârun ileyhin envâr-ı celâdet ü übehhet-i cebîn hâlinde lâmi‘ ve âsâr-ı istîhâl ü istihkāk [129a] cebhe-i mâhiyyetinde sâtiʻ olup, sanʻat-ı nîze-bâzî ve tîr-endâzîde ma‘dûmü'l-akrân ve fenn-i fürûsiyyet ü şecâʻatde nâdire-i zemân olduğu bi't-tecribe maʻlûm-ı Şehriyâr-ı gîtî-sitân olmağla, o makūle erbâb-ı kābiliyyet ü isti'dâdın 'azâyim-i umûr u hutûb ve mevâki‘-i kâr-zâr u hurûbda istihdâmı sebeb-i takviye-i bâzû-yı Devlet ve bâʻis-i tezâyüd-i fürûşân-ı memleket olduğuna binâ’en, hakkında âfitâb-ı ‘alem-tâb-ı Hüsrevâne lemʻa-rîz ve bahr-ı zehhâr-ı ‘âtıfet-i Şâhâne mevc-engîz olup, işbu şehr-i Receb'in onaltıncı Cuma günü Derya Kapudanlığı inzımâmıyla müşârun ileyhe rütbe-i vâlâ-yı Vezâret ihsân ve selefi Hüseyin Paşa uğur-ı Devlet-i ebed-müddetde siklet-dîde ve zahmet-keşîde olmağla hân-ı vesî‘ü'l-nevâl-i Pâdişâhî ve mekârim-i meşmûletü'l-'avâlim-i Şehinşâhî'den kûşe-nişîn-i hirmân olması şâyân görülmeyüp, şimdilik Hânya muhafazasıyla mecbûru'l-hâtır kılındı.