Şumnu Kasabası'nda fîmâ-baʻd temekkün ü istikrâr lâzım gelmeyüp, Edirne tarafına ‘azîmet, taʻyînât ve sâyir mesârifât-ı zarûriyyenin taklîline ‘illet olacağı bi'l-müşâvere karâr-gîr-i erkân-ı devlet olmağla, ahmâl-i sakīle gerüden gelmek ve Ordu-yi hümâyûn müteʻayyinlerinin baʻzısı ilerü aşmak sûretlerine nizâm ve Yegen Paşa ve ‘Osmân Paşa def‘-i eşrâr-ı etrâf mekāsıdıyla Şumnu'da terk olunup, Cumâdelâhıre'nin yigirmi yedinci günü Sadrıaʻzam dahi Şumnu'dan hareket ü kıyâm ve sekiz günde Edirne'ye mukām eyledi. Tetâbu‘-ı esfâr sebebi ile Rumeli muhtell ve sekenesi ızrâr-ı erbâb-ı tuğyân ile mu‘tell olmakdan nâşî, nizâma muhtâc ve ihmâl olunduğu hâlde zîr-i destân-ı memleket mübtelâ-yı tezâyuk u inzi‘âc olacağları muhakkak olmağla, esbâb-ı nizâmına teşebbüs olunmak husûsu Sadrıaʻzam tarafından vürûd eden baʻzı hutût-ı hümâyûna idrâc olunmuşidi. Rumeli keyfiyyetine iddi‘â-yı vukūf edenler ile müzâkereeye mübâşeret ve ibtidâ-yı emrde dağlı eşkıyâsının def-i vücûdlarıyla tathîr-i memleket sevk ü tergīb ve ‘avene-i eşkıyâ nâmıyla mahbûs olan İdrîs ve Halîl, Edirne'de memerr-i nâsda vâki‘ baʻzı mahallere berdâr ve Yergöğü cenginde behâdırlığı zâhir olan Çengîz Mehmed Girây Sultân'ın dahi gāyilesi def olunmak tasvîb olunup, hıdmet-i sâbıkasına nazaran baʻzı evzâ‘-ı küstâhânesi hazm olunur idi. Ancak Sultân-ı mûmâ ileyh dâyire-i edebden hâric baʻzı etvâra cesâret ve fukarâ vü zuʻâfâyı yeni başdan mazhar-ı hasâret eylediğinden başka mahsûlât-ı nâs gûyâ mefrûzü'l-kalem hâsı ve meclûbât-ı 'âlem sânki mihlab-ı tegallübünün iktinâsı olup, bu hâl [128b] ile tedârük eylediği eşyâ-yı Magsûbe[s]i magzûb-ı Devlet olup, tarafına ilticâ eden derbederlere ve Deliorman eşkıyâsına bahş eylediği maʻlûm ve izâle-i mazarratı beyyinü'l-lüzûm olmağla, Yegen Paşa etrâf-ı 'asâkiriyle üzerine taʻyîn olundukda tâb-âver-i mukāvemet olamayup, kararı firâra tebdîl ve meʼvâ vü mesken tahrîbi ile tezlîl olunmuşidi. Mûmâ ileyh Kırkkilisa kurbunda sâkin Selâmet Girây Sultân'ın yanında mestûr ve gümâştegân-ı Devlet'in o havâlîden çekildiklerini istimâ ile tekrar Tırnova taraflarına kasd eylediği mütevâtir ü meşhûr olmağla, cürm-i istishâb ile Sultân merkūm adaların birine iclâ ve Çengîz Sultân'ın dahi Tırnova semtlerinde olduğu o etrâfda olan ru’esâ-yı ‘askere inhâ ve hayyen ve meyyiten ele getürülmesi husûsu merkūmlara tenbîh ü îsâ olundu. Mûmâ ileyh Tırnova aʻyânı 'Osmân Efendi'nin kız karındâşını cebren ve kahren keşîde-i hibâle-i nikâh etmiş bulunmağla, birkaç gece hânesinde karâr ve etrâfdan üzerine müceddeden ‘asker taʻyîn olunduğunu tahkīk ile firâr edüp, şe'âmet-i kademi derd-mend ‘Osmân Efendi'ye sârî olup, hakkında seyf-i siyaset meslûl ve gadr-i ehl-i nifâk ile maktûl oldu. Mûmâ ileyh kesîrü'l-îrâd bir şahs olup, kati çok îrâd u zimem ve nükūd terk etmiş bulunmağla meʼmûr-ı zabt-ı emvâli olanlar mâlik-i defîne olup, cânib-i mîrîye ‘arz-ı şey-i kemîne eylediler.