Evvelki şart: Devleteyn beyninde mesbûk olan muâdât def ü ahlâf u a‘kāb ve tarafeyn halkı miyânında [125a] berren ve bahran sulh cârî olup, tarafeyn üserâsı ıtlâk ve töhmet ile terk-i diyâr edenlerin emvâl ü emlâkları baʻde's-sulh verilüp, memleketlerinde ikāmetleri câyiz ola. İkinci şart: Kaynarca Musâlahası ve sâyir 'ahid-nâmeler ki sinîn-i muhtelife ile devleteyn beyninde vukūʻ bulmuşdur, cümlesi düstûru'l-‘amel olmak[na]. Üçüncü şart: İle'l-ebed Nehr-i Turla iki devletin sınuru ola. Şöyle ki, Rûsiyyelü'nün hudûdu Turla'ya degin imtidâd oluna ve nehr-i merbûzun sol tarafında olan erâzî Rûsiyyelü'de kalup, sağ tarafında olan erâzî Devlet-i ‘aliyye'ye redd oluna. Dördüncü mâdde: Esâsın şart-ı râbiʻi mefhûmunca hudûd-ı devleteyn işbu muhârebeye gelince ne vechile ise yine ol vechile olup, Rûsiyyelü'nün bu muhârebede istilâ eyledikleri yerler ve kal‘alar ‘alâ-hâlihâ ve bi-cümletihâ Devlet-i ‘aliyye'ye redd olunup, Eflak ve Boğdan memleketleri dahi mukaddem vukūʻ bulan muʻâhede üzere Devlet-i 'aliyye'ye terk oluna. Beşinci mâdde: Tiflis Hânı'nın memleketine Çıldır vâlîleri tarafından taʻarruz olunma[ya]. Altıncı mâdde: Nehr-i Kuban'nın sol tarafında mütemekkin tavâyif ü kabâyil-i Devlet-i ‘aliyye Rûsiyyelü zabtında olan memleketlere tecavüz etmeyüp, ızrârdan men' oluna ve eğer def‘-i zarar müddet-i mu‘ayyene zarfında hâsıl olmazsa vukū‘ bulan zararı Devlet-i ‘aliyye hazînesinden ber-vech-i tazmîn edâ ede. Yedinci mâdde: Kezâlik Cezayir ve Tunus ve Garb Ocağları, Rûsiyye sefâyinine taʻarruz eylediği hâlde şart-ı mezkûr cârî ola. Sekizinci mâdde: Rûsiyyelü'den bi'l-irâde İslâm'a gelen ve kezâlik tenassur edenlere müdahale olunmayup, tarafeynden bi'l-cümle üsârâ bilâ-semen ü mukābele âzâd oluna. Dokuzuncu mâdde: Temessükler temhîrinden sonra berr ü bahrda [125b] olan tarafeyn ‘asâkirine ihbâr-ı sulh işâʻa oluna. Onuncu mâdde: Mu’teber Büyük Elçiler taʻyîn oluna. Onbirinci madde: Devlet-i ‘aliyye sularından ve memâlikinden Rûsiyye ‘askeri vakt ü hâle mutâbık evkātda çekilüp, diyârlarına gideler. Onikinci mâdde: Tarafeyn senedleri iki haftada ve kābil olur ise dahi ekall müddetde mübadele oluna. Onüçüncü mâdde: Musâlaha tasdîk-nâmeleri beş haftada mübâdele oluna.