Bir takrîb dâhil-i katâr-ı hâcegân olan Zindân Kâtibi ki, ser-mest-i nefs ü hevâ ve seng-endâz-ı şîşe-i şerm ü hayâdır, hem-civârı olan Nakīb-zâde Monla'yı müte'alliklerinin birinin hıtân sûruna davet edüp, nazm: Tertîb-i bezm-i sûr bu ‘âlemde sâkiyâ, Def‘-i humâr-ı ‘işrete bir nev behânedir. mefhûmu üzere kendüsü ser-halka-i cemʻiyyet ve herze-vekîl-i dâyire-i vekāhat olup, sâkiyân-ı nîm-mest ve şarâbdârân-ı ‘âşık-perest ile bezm-i dil-ârâsını nümûne-nümâ-yı nigâr, hâne-i çîn ve nakl-i gûnâ-gûn ve eşribe-i tarab-efzûn ile meclis-i insi tezyîn eylemişdi. Nazm: Ey sâkī-yi 'işve-kâr u tannâz, Ser-mest-i harâb-ı bâde-i nâz, Bast ile bisât-ı inbisâtı, Kerem eyle çû-bâde ihtilâtı, Bazâr-ı safâ yine kurulsun, Mey nakd-i revân gibi sürülsün, Her şahs bu bezme mahrem olmaz, Her destine câm alan cemm olmaz. terâneleriyle dem-sâz-ı ‘âlem-i âb ve tenâvül-i tâs ve te’âtî-yi kâs ile, nazm: Kum feskinî ve da‘i'r-reșâde li-ehlihi, İnne'ş-şebâbe matiyyetü'l-âsâmi, Ve izâ'l-hümûmü tețâvelet fâțlub lehâ, 'Îşen, müdâmen bi'l-tizâmi müdâmi, Sahbe'e testaʻu fi'l-küûsi keʼennehâ, Şemsün tükallibü-hâ büdürü temâmi, Ve tekâdü tehfâ rikkaten ve lețâfeten, Lev lem yühayyilhâ [126a] hayâle'l-câmi. neşâyidini dîvân-ı hasb-i hâlden intihâb ile sürûd-ârâ-yı nâdî-yi ahbâb olup, keyfiyyet-i sahbâ-yı gam-zed ile mirât-ı hâtırları mücellâ oldukda, nazm: Ve-lâ teşrab bi-lâ nâyin veʻûdin, Fe-inne'l-hayle teşrabü bi's-safir. mefhûmu üzere tabîʻatları istimâ'-1 egānîye temâyül ve fi'l-hâl hunya-gerân-ı hôş-nevâz ve mutribân-ı hûb-avâz tedarik ü ihzârıyla tevbîh ü serzeniş-i ‘avâzilden tegāfül eylediler. Nazm: Gamın câna handek-i kârgeridir, Def niçe belâmıza siperdir, Korkar ki yiye tapunca muhkem, Def dâyiresine uğramaz gam, Mutrib nefesin müdâm olsun, Bizden demine selâm olsun, Ve lülesiyle nevâ-sâz-i bezm-i ‘işret. ve giderek bir rakkās mütenâsibü'l-ihtizâz celbi ile tekmîl esbâb-ı ünsiyyet eylediler. Nazm: Ve râkısin şibhe ğusni'l-bâni kâmethü, Tekâdü tezhebü rûhî fî-tenakkulihi, Lâ yestekırrü lehü fî-raksıhi kademün, Ke'ennemâ nârü kalbî tahte ercülihi. Îkā'ât-ı mütenâsibe ve harekât-ı mütevâfıka ile rakkās-ı mezkûr sayd-ı kulûb-ı huzzâr ve tehyîc-i garâm-ı nüzzâr etmek hasebiyle miyânede dâʻîye-i rekābet bedîdâr ve 'adâvet ü buğz aşikâr olup, te’sîr-i nâr-ı muhabbet ve serayân-ı harâ[re]t-i şevk ü meveddet ile ahadühümâ âhara tahvîl-i nazar ve giderek sell-i hançer ve ‘arz-ı şeşper edüp, münâdemeleri müşâtemeye ve musâhabeleri mühâsameye mübeddel olup, sadâ-yı mestâne ve ‘arbede-i rindâneleri âfâk-gîr ve bu vaz‘-1 nâ-ber-câ vâsıl-1 sem‘-i Şehriyâr-ı 'adâlet-semîr olmağla, merkūm Zindân Kâtibi ve birâderi ve Nakīb-zâde Kıbrıs'a nefy ü iclâ ve tesvîlât-ı şeytâniyyeden münba'is olan hareket-i nâ-ber-cânın mükâfâtı haklarında icrâ olundu.