Merkūm Belgrad'da kâyin erbâb-ı fesâddan olup, maktûl Hüsnü i'âneti ile giderek o havâlîyi kabza-i tasarrufuna alup, perr ü zerden ve mukāta‘ât hâsılâtından ve cürm ü cinâyetden emvâl-i kesîre tahsîl ü iddihâr ve reʼâyâ-yı Belgrad'ı müsâderât-ı mütenevvi’a ile izrâr edüp, hal’-i ribka-i itâ’at etmelerine sebeb-i müstakill ve vülât ü hükkâm ve kâffe-i umûrda merkūma mürâca’at edüp, emr ü nehyine mümtesil olurlar idi. Vaktâ ki, Belgrad mahsûr olup, tedarik etdiği emvâl a'dâya nasîb olacağını tevehhüm ü teslîm, kal’ada mahzûr mezkûr bir taraf olduğunu tefehhüm edüp, kal'a-i Pâdişâ[hî'yi] nefs ü mâl-i habîsine fedâ ve gayret-keşân-ı dîn ü devleti igvâ ile on dört gün [z]arfında Belgrad gibi bir kal'a-i hasîni reh-âverd-i makdem-i a‘dâ etmişidi. Başında haşerât-ı nâsdan cem‘-i kesîr müctemi‘ ve suhûletle ele girmesi mümteni‘ olduğundan tertîb-i cezası vakt-i âhara taʻlîk ve şimdilik o havâlînin muhafazası şartıyla Mîr-i mîrânlık verilüp, gerden-i emniyyesi tatvîk ve Koca ‘Abdî Paşa ki, merkūmun yar-ı vefâdârı ve Belgrad'dan Niş'e ‘azîmetinde revâc-dâde-i maksad u kârı idi, merkūmu istishâb edüp, o havâlî vü etrâfın umûruna müsteşâr ve belki kâffe-i şu'ûnâtına herze-kâr edüp, Pajorafça câniblerine merkūmu taslît ü havâle ve Devlet-i 'aliyye'ye mütemahhız u mültecî olan reʼâyâyı istimâle muktezî iken tevsen-i tünd-rev-i zulm ü iʻtisâfı semtlerine icâle ve sedd-i ramak içün i‘dâd eyledikleri hubûbâta varınca gasb edüp, eşk-i hûnîn fukarâyı mânend-i rûd isâle edüp, inʻikād-1 sulh tehakkukunda Belgrad'a tevellâ etmek hulyâlarıyla etrâf u eknâfda der-kemîn-i fursat ve me’lûf-i zulm ü hasâret olan fitne-sâzân-ı Belgrad'ı başına cemʻ ve bezmine [122a] şem' etmişdi. Belgrad Muhâfızlığı yekke-süvâr-ı meydân-ı celâdet olan Vezîr Ebû Bekir Paşa'ya tevcîh ü tefvîz olunup, Niş'e vüsûlünün haberi merkūmun mihmân-ı ribât-ı sâmia-i yakīni oldukda, be-hükmî "el-Hâyinü hâyifün" bu vaz'-ı gayr-i me'mûlden müsteşʻir ü mürteʻiş ve gâh şakk-i ‘asâ ve gah firâr u ihtifâ endîşeleri zihn-i sakīminde müntakış olduğunu Vezîr-i müşârun ileyh idrâk ve fi'l-hâl nasb-ı şebâyik letâyifü'l-hiyel ile merkūmu matmûre-nişîn-i vâdî-yi helâk edüp, tafsîli bu ki, merkūmun reʻâyâ-y-ı müste'nise hakkında etdiği gadr ü hasâret ma'lûm olup, bir takrîb orduya celb ü in‘idâmı tasmîm ve da‘veti mutazammın tarafına hitâben emr-i şerîf takdîm olunmuşidi. Başına gelecek felâket ü ‘ukūbete vâkıf ve ‘azîmetden mütecânif olduğu mütehakkak oldukda, Belgrad muhafazasına meʼmûr olan müşârun ileyhe istîsâliyçün emr-i ‘âlî tesyîr bi-eyy-i hâl ele getürülmesi tahrîr olunup, müşârun ileyh Niş'e vüsûl ve celb-i hâtır ve def-i evhâm u havâtırına meşgûl olup, şöyle ki, orduya me'mûriyyeti baʼzı ‘azâyim-i umûrda istihdâm olunmasına mebnî olup, ‘azîmetden izhâr-ı ‘acz eder ise bu havâlîde istihdâm husūsu orduya tahrîr ve 'afvı fermânı celb olunacağı emr-i yesîrdir. Ancak Belgrad'ın kâffe-i ahvâline muttali' ü vâkıf olmağla li-ecli'l-istişâre: "Niş'e vürûdları matlûbdur" zemîni ile birkaç defa tarafından irsâl-i rüsül ü resâyil ve ‘âkıbetü'l-emr Nîş'e dâhil olup, mûceb-i itimînân olur baʻzı mukaddemât-ı ebleh-firîb ile tesliyet vü teʼmîn ve işbu Saferü'l-hayr'ın evâyilinde Niş Serâyı'na kemâ-sebak da‘vet olunup, nerdübândan çıkar iken der-kemîn olan mübârizîn yedinde sevret-i enfâs-ı hayâtı teskîn olundu. [122b] Üç günden sonra habâsetde merkūma mu‘âdil olup, ihfâ-yı cerâyim niyyeti ile Niş cizyesini cibâyete müştagıl olan Kara İsmaîl dahi hânesinde kebs olunup, merkūm bir merd-i behâdır u hâzim olup, refîki Kara Hasan nâm şakī ile miyâne-i ‘askerden çıkup, muhârebe eyleyerek semt-i selâmete ‘âzim oldu. Deli Ahmed Paşa o havâlîde yed-i gālibe sahibi olup, Belgrad'dan me'yûs olduğu hâlde istîsâl ü ihlâkı böyle bir müddebir vezîre sipâriş olunmasa idi, ilâ yevminâ hâzâ o etrâf pây-mâl-i erbâb-ı cevr ü iʻtisâf olup, reʼâyâ cibâl-i şâhikada temekkün ü istikrâr ve Nemçe ulağları nehb ü gārete giriftâr olarak Devlet-i ‘aliyye'yi ta‘cîzden hâlî olmayup, bir gāyile-i hâyile nümûdâr olur idi. Mahzâ yümn ü ve ikbâl-i Şâhâne ile böyle bir gaşûm u zalûm hüsn-i tedbîr ile ‘âlem ü vücûddan maʼdûm ve ‘avene-i havanesi dahi tenhâ-rev-i vâdî-yi hizî vü mezellet olup, birer mahall-i menî'ada ihtifâ ile resm ü cismleri nâ-maʼlûm oldu.