Rûsiyyelü ile ‘akd-i esâs u mütâreke ‘akabinde Baş-muhasebeci olan İbrâhim Efendi bi'l-irâde Âsitâne'ye ‘avdet edüp, mansıbı hâlî ve bi-hasebi't-tarîk [119b] Baş-muhasebecilik bu Fakīr-i kesîrü't-taksîre tevcîh olunmuşidi. Erbâb-ı kemâl ü maʼrifete bi't-tabʻ bağız olan ba‘zı ehl-i hıkd u hased: "Baş-muhasebe mansıbı bu hılâlde müvecceh olan şahsa bâ‘is-i tezâyüd-i kadr ü i‘tibâr olup, zımnen esâsın istihsânını müstelzim olmağla, şâyed a‘dâ bu kazıyyeye vâkıf olup, sulhun pesendîde olduğunu zu‘m u ihsâs ve esâsdan hâric ba‘zı teklîfât ile Devlet-i ‘aliyye'yi iz‘âc ede. Her nekadar bu mâddede gadr ü zulm şâ'ibesi mahsûs ise dahi teshîl-i maslahat-ı devlet zımnında yine şân u vekārı muhafaza olunarak mûmâ ileyhin bir hıdmet-i cesîmeye me'mûriyyeti tabî‘at-ı maslahata muvâfık mülâhaza olunur" demişleridi. Nazm: ‘Âlemde zerre denlü yoğiken vücûdumuz, Müşkil budur ki, zerreden efzûn hasûdumuz. Tertîb etdikleri kazıyyenin sugrâ vü kübrâsı mukaddimeteyn-i hıkd u hasedden tertîb olunup, netîcesi gadr-ı sarf olduğu nezd-i ferd-i Mülûkâne'de her ne kadar derece-i tahkīke resîde olmuş ise dahi, muktezâ-yı hâl iltizâm olunarak mümâşât olunup, tahdîd-i Bosna veyâhûd Belgrad'da vâki' baʻzı umûr tesviyesi 'unvânıyla me'mûriyyetimiz irâde buyurulup, ol-bâbda hatt-ı hümâyûn dahi vârid olmuşidi. Suver-i me'mûriyyetde bu Fakīr tahyîr olunup, tahdîd mâddesinde baʻzı havâtır zihn-i fâtirde zâhir olup, defiyle tekayyüd ve Nemçelü tarafından teslîm olunacak kılâʻ u mühimmâtın tesellümü tercîh ve Belgrad'a müteveccih olmuşidim. Baş-muhasebe'nin ref i hatt-ı hümâyûnda musarrah değil iken Sivâsî Hasan Efendi ki A ʻyâ min bâkilin ve fart-ı cehl ü gabâvet ile Ahmakun min Hebennekatin misliyle mümâsil ve belki aʻyen-i nâsda bir şahs-ı sâkıt u sâfildir. ‘Amele iștigāl ve merkūm ile [120a] müşterek fî'l-mâhiyye olan bir şahs-ı mümessil-i ‘azîmü'l-heykel ihtilâf-1 lugāt ve tumturâk-ı ıstılâhât ile ‘alâka-i iltihâma nazaran tervîc-i hâl edüp, Nîş'e vusûlümüz günü Baş-muhasebe'yi rübûde-i çengâl-i ihtiyâl eyledi. Nazm: Semend-i tabʻıma reşk ü hasedlerindendir, Beni geçerse bir iki himâr-ı lâ-yefhem, Zemâne ehl-i kemâlin kadîm düşmenidir, Sebük-serânı eder etse suffe-zîb-i niʻam. Bu sebeble mutasarrıf olduğu Anadolu Muhasebesi münhall olup, Vak'a-nüvîslik inzımâmıyla Büyük-tezkireci olan Enverî Sa‘dullah Efendi'ye şâyân u mahall görüldü. Bu felâket-zede dahi giryân u nâlân garîk-i yemm-i ye's ü hirmân olarak Belgrad'a vâsıl ve süpürde-i ‘uhde-i sadâkatim olan hıdmet-i mühimmeyi ikmâl ile muntazır-ı ‘inâyet-i Şehriyâr-ı sütûde-hazâyil olmuşidim. Altı mâhdan sonra Asitâne'ye rücû'-ı irâde-i Şâhâne'si vukū' bulup, bir sene-i kâmile bila-mansıb Âsitâne-i saʻâdet'de ikāmet ve me'lûf olduğum vech üzere mütâlaʻa vü mübâheseye inkibâb ile egerçi imrâr-ı vakt etmişidim. Ancak îrâd-ı tabîʻî ve iddihârım olmayup, sadaka-i Pâdişâhî ile teʻayyüş eylediğime binâ'en gerek seferde ve gerek Belgrad'da ve gerek bir sene Asitâne'de ikāmetim hâlinde düyûn-ı kesîre'ye müstağrak ve gayret-i akrân beliyyesiyle dâyire-i ‘Acizânem tefrîk olunmayup, dil-bend-i ‘inâyet-i Hakk olduğuma binâ'en bâre-i kemterânemde âfitâb-ı âlem-tâb-ı merhamet-i Şâhâne lemʻa-rîz-i zuhûr ve tevcîhât vukūʻunda Anadolu Muhasebesi ihsânıyla enbân-ı derûnem mâl-â-mâl sürûr olup, nazm: Taliʻin olmaz ise burc-ı saʻâdetde kavî, Senevî mansıb ile beslemeyesin sen evi. mefhûmu ile ser-be-ceyb-i endîşe vü tefekkür iken bir iki mâhdan sonra hıdmet-i vekāyi' ile meʼmûr ve müteʻâkıben [120b] ‘atıyye-i behiyye-i Mülûkâne ile manzûr olduğumdan, fi'l-cümle teneffüs ü tereffüh hâletleri nümûdâr ve mirkāt-i kadr ü iʻtibârım vâsıl-ı küngüre-i felek-i devvâr oldu. Câbir-i ‘izam-ı kesîr ve mâlik-i zimâm-ı sagīr ü kebîr olan hazret-i Rabb-i kadîr, Dâver-i bülend-mertebe ve Hudâvend-i sütûde-menkıbe hazretlerini şevket ü ikbâl ile serîr-ârâ-yı bekā vü hulûd ve te'yîd-i dîn ve ihyâ-yı sünen-i Seyyidü'l-mürselîn mekāsıd-ı hayriyyesiyle levha-tırâz-ı şühûd olan tedâbir-i Mülûkâne'sin ber-vefk-ı dil-hâh hayyiz-resân-ı vücûd eyleyüp, hâr-zâr-ı gülşen-serây-ı Saltanat olan eʻâdî-yi dîn ü devleti direvîde-i dâs-ı dest-i Sâhib-kırânî ve köhne-binâ-yı i'mâr-ı bed-hâhân-ı Devlet-i ‘aliyye'yi seyl-âb-ı efken-i batş-ı kahremânîleri eyleye, âmîn.