Devlet-i ‘aliyye ile Nemçelü miyânında ‘akd-ı sulh vâkiʻ olup, ahadühümâ âhara elçi göndermek de’b-i dîrîn olmakdan nâşî, Nemçelü'nün elçisi yola çıkup, Devlet-i ‘aliyye tarafından dahi elçi irsâli tasmîm ve hıdmet-i mezkûre ile Yeniçeri Kâtibi olan Râtib Ebûbekir Efendi tahdîm ve ortaelçiler ile düvel-i Efrenc'e irsâli mu‘tâd olan hedâyâ dahi yed-i emânetine teslîm olunup, rû-be-râh-ı ‘azîmet olmuşidi. Nemçe Elçisi Âsitâne-i sa‘âdet'e rû-nihâde ve Büyükelçi irsâli ile hâsıl olan tekellüf-i resmî beyne'd-devleteyn bertaraf olduğundan, sıfru'l-yed ve bilâ-hediyye vârid olduğunu ifade etmekle mukaddemâ Râtib Efendi ile irsâl olunan hediyye istirdâd olunup, Nâme-i hümâyûn ibkā ve mu‘âmele bi'l-misl-i resmî icrâ olundu.