Battâl Paşa vak'asından sonra Anapa'ya Ser'asker nasb olunan 'Abdullah Paşa'ya hüküm gönderilüp, bir ân âkdem Anapa'ya vusûlü te’kîd olunmuşidi. Müşârun ileyh ba'zı behâne ile ifâte-i zemâne ve ne hâl ise gemilere binüb ‘azîmet kasdını ibâne edüp, ancak Anapa tarafından vürûd eden hevâdisden ‘âkıbet-i mâddeye intikāl ve kal'ada bulunmak hayâliyle girîve-kerd-i vâdî-yi ihtiyâl ve ‘an-asl mebgūzu olan derebeyleriyle iş‘âl-i nâyire-i kıtâl edüp, cihâdün fi-sebîlillâh maslahat-ı hayriyyesinden âbâ ve Anapa'da giriftâr-ı mezâyık u belvâ olan ehl-i İslâm'a ‘adem-i intisâr ve zimnen tervîc-i mekāsıd-ı aʻdâ-yı mekkâr edüp, inkıtâ‘-1 iʻânetkârân ile ehl-i kal‘a meʼyûs ve bu sebeble öyle bir maʻkul-ı metîn giriftâr-ı dest-i hasm-ı menhûs olmuşidi. Devlet-i ‘aliyye'nin bir sülmesini sedd eder, deyü Erzurum ve Trabzon eyâletleri müşârun ileyhin süpürde-i ‘uhde-i iʻtibâr u rağbeti kılınup, kâffe-i müstedʻiyyatı müsâʻadeye makrûn ve bu cihetler ile mâlik-i hazâyin-i Kārûn olup, bu ni'metin kadrine hürmet ve vaktiyle Anapa tarafına ‘azîmet eylese, ehl-i kal'aya kuvvet ve belki [118a] aʻdânın ye's ü hırmânına ‘illet olur idi. Ancak tevehhüm-i sarf ile kalʻa istîlâsında bulunmak dâʻiyesini mûceb-i selâmet ‘add edüp, gışâve-i gaflet bâsîretine hâyil ve hıfzına mütehâllik olduğu vücûd-1 ‘aks-i kazıyye ile zâyil oldu. Tafsîli budur ki, Anapa'da vukūʻ bulan hâdisenin icmâli ve müşârun ileyhin taksîr ü ihmâli maʻrûz-ı Dergâh-ı ‘alî olup, i‘dâmına irâde-i Cihânbânî teʻallük ve kazıyyeye müşârun ileyh vâkıf olup, Trabzon Kalʻası'na velhân u tersân duhûl ile izhâr-ı nedâmet ü temelluk edüp, suhûletle itmâm-ı kâr müteʻassir ü düşvâr olduğuna binâ’en, eyâlet-i Trabzon Kuğu-zâde Süleymân Paşa'ya tevcîh ü izâlesi husūsu dîger emr-i celîlü'ş-şân ile tenbîh olunup, mûmâ ileyh dahi Trabzon'un 'uhdesine tevcîhi telmîh ve tav'an ve kerhen kal'adan ihrâc olunacağını tasrîh eylediğine binâ'en, ikāmete kudret-yâb olamayup, mansıbı olan Erzurum tarafına ʻazîmet içün kalʻadan hurûc ve Süleymân Paşa tarafından hâric-i şehirde vâkiʻ güzergâhda taʻbiye olunan ʻasker sedd-i râh olup, müşârun ileyhi iʻdâm u ifnâ ve emvâlini gāret ü yağma etmeleriyle, ser-i maktûʻunu Paşa-yı mûmâ ileyh Âsitâne'ye irsâl ve dest-res olduğu emvâl ü eşyâsını hıfz ile ifâde-i hâl eyledi. Ancak maktûl-i müşârun ileyhin Caniklüler dâyiresinde kesb eylediği emvâl-i bî-hadd ü şümâr ve ʻale'l-husûs Erzurum ve Trabzon'da iddihâr eylediği mebâliğ nâ-güncâ-yı havsala-i muhâsibân-ı rüzgâr olup, kâffe-i emvâli hârice ihrâc olunup, yağma-gerânın târâc etdikleri eşyâ vü nukūd istirdâd olunmak bâbında Kapucu-başı ʻÖmer Paşa-zâde ʻAbdullah Bey taʻyîn ve ekser emvâli hazîne-i hümâyûna imlâ vü teşhîn olundu.