Ahvâl-i enâma vâkıf olanların biri der ki: "Ordu-yi hümâyûn Silistre'de iken ma'zûl-ı merkūm Silistre'de mütemekkin hasekî mütekāʻidlerinden mütemevvil bir kimesneyi bilâ-sebeb habs edüp, baʻde'l-müsâdere itlâkını merkūz-ı zamîr etmişidi. Silistre ehâlîsi zikrolunan hasekînin hüsn-i halîne şehâdet ve isnâd olunan töhmetden beriyyü'z-zimme olduğunu ifâde ile dâmen-gîr-i şefâʻat olmalarıyla Sadrıaʻzam recâlarına müsâʻade ve tahliye-i sebîli içün Yeniçeri Ağası'na âdem firistâde edüp, [117b] kendüsü gāyile-i sipâh defi içün Şumnu'ya ‘âzim olup, teʼyîd-i irâde zımnında Kethudâ Bey tarafından sû'âl-i mâdde olundukda: "Bir iki gün habsi lâzımdır" deyü Ağa-yı mûmâ ileyh cevâb-dâde olup, tekrar haber gönderildikde mûsel-i peyâm-ı mey-âşâm olduğu hengâma tesadüf edüp, habs ü ıtlâk mel‘abe-i sıbyâna dönüp, "Ocak- ‘âmire kendüsünü bunlara göstermek lâzım" geldi deyü jâj-hây olduğunu münhiyân-ı ahbâr, sâmiʻa-i Sadrıaʻzamî'ye îsâl ve bu sebeble hakkında gayz-ı şedîd istitâr olunmuşidi. Ordu Şumnu'ya geldiği gibi ‘azli ile iktifâ ve belâ-yı lisân sebebi ile hâyib ü hâsir Filibe cânibine ta'rîb ü iclâ olundu.