Millilü İskân-başısı olup, birkaç seneden berü Rakka ve Diyarbekir [118b] etrâfında ser-dâde-i vâdî-yi bagy u muhâlif olan Tîmûr-ı bî-şuʻûr sinîn-i mutâveleden berü üzerine edâsı lâzım gelan emvâl-i mîrînin teslîm ü iʻtâsında izhâr-ı teʻannüd ve Rakka ve Diyarbekir eyâletlerinde vâkiʻ kazâ vü kurâya medd-i yed-i temerrüd edüp, hâsılâtını nefsine tahsîs ve erâzî-yi münbitelerinde keyfe-mâ-yeşâ' hars u zerʻ edüp, hubûbâtını tahlîs ile erbâb-ı vezâyif ü timârın meʻâşlarını tengīs ve belki cihâd u gazâya muhtass olan cünûd zafer-mevʻûd-ı Pâdişâhî'yi ifnâ-yı vâridât ile bî-tâb u tengīs eylediğinden başka, vülât ü ümerâ-yı etrâf yed-i tegallübünden ʻâciz ve kuvve-i mâliye ü ʻaskeriyesi istîsâl ü tedmîrine mâniʻ ü hâciz olup, Diyârbekir ve Rakka vâlîlerinin ahkâmı fekat kürsî-yi eyâlet ve dârü'l-imâre-i memlekete cârî ve bu sebeble şakī-yi merkūm gülşen-serâ-yı mülk-i Pâdişâhî'nin hâr-ı dâmen-güzârı olmuşidi. Defʻ-i vücûd-ı levs-endûduyla fukarâ vü zuaʻfâyı irâhe ve galebe vü tasallutunu o havâlîden izâha emr-i ehemm görüldüğüne binâ'en, bi'l-fiʻl Bağdâd Vâlîsi Vezîr Süleymân Paşa 'asâkir-i kesîfe ile üzerine meʼmûr ve Rakka ve Haleb vâlîleri ve o havâlîde kâyin erbâb-ı harb ü darb maʻiyyetine izâfe ile sevâdd-ı cemʻiyyeti mevfûr kılınup, müşârun ileyh dahi Bağdâd'dan hareket ve Rakka taraflarına vusûl bulduğu şakī-yi merkūmun ma'lûmu oldukda, savlet-i dilîrânesine tâb-âver olmayacağını cezm ü teyakkun ile gavta-hor-ı bahr-ı tehayyür ü ıztırab olup, me'men ü melce' ittihâz eylediği Bûk nâm mahalle duhûl ve üzerine varıldıkda nehr-i Fırat'ı elli altmış kadar âdem ile mürûr ve tahlîs-i nefse meşgül olup, hevâdârları bi'l-cümle güşte-i seyf-i siyaset-i Hâkānî ve sinîn-i çendînden berü iddihâr eylediği emvâl târâc-kerde-i gümâştegân-ı Sultânî olduğundan gayri, Şavî-zâde Süleymân Bey mekâsib-i kesîreye mâlik ü nâyil ve belki defîne-i Kārûn'a vâsıl olup, bundan sonra [119a] Tîmûr-ı meslûbü'ş-şuʻûrun birâderi İbrâhim Ağa, İskân-başı nasb u taʻyîn ve şakī-yi merkūmu ele getürmek vesâyâsı merkūma ifâde vü telkīn olunup, Bağdâd Vâlîsi Bağdâd'a 'avdet ve sâyir tavâyif-i 'askeri ricʻat ve gāyile-i mezkûre bi-hamdillahi Teʻâlâ zâyil ve o havâlîde âsâr-ı i'mâr hâsıl oldu.