Çünki Nemçe musâlahası karîn-i hitâm ve Rûsiyyelü ile vaz‘-1 esâs ve mütâreke pezîr-refte-i nizâm olup, gāyet-i mütâreke ne makūle hâdise tevlîd eyleyeceği mevhûm ve hazm u ihtiyâta riʻâyet beyyinü'l-lüzûm olmağla, kemâ-kân mürettebât-ı seferiyye [115a] sene-i âtiye içün âmâde kılınmak vâdîleri iltizâm olunup, bu mazmûnda etrâf u eknâfa evâmir-i celîle tisyâr ve Ordu-yi hümâyûn'da olan rû'esâ-yı 'askere dahi bu kazıyye ihbâr olunup, Maçin sahrâsında fîmâ-baʻd ikāmeti mûceb-i ahvâl ü etvâr kalmadığından Ordu-yi hümâyûn'un hareketi lâzım gelmekle, işbu Muharremü'l-harâm'ın ikinci Pençşenbih günü Maçin sahrâsından harekete kıyâm ve Silistre sahrâsına nasb-ı hıyâm olundu. Silistre sahrâsında Ziștovi mükâlemesinde 'avdet eden murahhaslar ve maʻiyyetlerinde olan ketebe Sadriaʻzam ile mülâkāt etmeleriyle, Baş-murahhas olan Re’is Efendi'ye ve İkinci Murahhas olan Ordu Kadısı Efendi'ye birer ferve-i semmûr ile birer esb-i müzeyyen taraf-ı hümâyûn'dan ihsân olunup, maʻiyyetlerinde olan Divân Kîsedârı “Avnî Efendi'ye ve Beylikçi Kîsedârı Muhib Efendi'ye ve Mektûbî hulefâsından Sa‘îd Efendi'ye birer kontoş kürk ilbâs ve hıdmetleri hayyiz-resân-ı kabûl olduğu ihsâs olunup, müddet-i yesîre murûrundan sonra Rûsiyye mükâlemesine me'mûriyyetleri dahi tahkīk ve bâlâda zikrolunan nevâziş ü mu'âmele ez-ser-i nev icrâ olunup, birkaç günden sonra vürûd eden Dürrî Efendi dahi mûmâ ileyhime terfik olunup, cânib-i Mîr-i mîrî'den harc-ı râhları i‘tâ vü teslîm ve levâzımât-ı sâyireleri ber-vech-i etemm tanzîm olunup, Silistre'den karşu tarafa imrâr ve mahall-i mükâlemeye tisyâr olundular.