Baş-muhasebeci olup, Şumnu'da baʻzı umûr tesviyesi zımnında terk olunan el-Hâc İbrâhîm Efendi iştidâd-ı ʻillet-i fu'âd hasebiyle Asitâne'ye [114b] ʻavdet irâdesinde olup, tavassut-ı şifâ ile hakkında tecvîz-i merhamet ve taraf-ı vâzıhü'ş-şeref-i Mülûkâne'den Asitâne'ye ʻavd ü insirâfı içün tahsîl-i izn ü ruhsat olunup, mansıbı hâlî kalmışidi. Bu Fakīr-i kesîrü't-taksîr Anadolu Muhasebecisi bulunup, mansıb-ı mezkûr Baş-muhasebe'ye mûsal ve mukaddemâ vekâlet dahi ʻuhdeme tefvîz olunmuş olduğundan, tekaddüm-i zâtî vü zemânî ile mansıb-ı mezkûra müstehakk u müste'hil görülmüşidim. İşbu Zilhiccetü'ş-şerîf'e gāyetinde zikrolunan Baş-muhasebecilik hakk-ı ʻacizânemde serzede-i zuhûr ve Anadolu Muhasebeciliği ile Sivasî Hasan Efendi sebük-hân-ı mekteb-i sürür oldu.