Bu esnâda Rûsiyye Feldmareşali Potemkin'in Kalas'a vürûdu şüyûʻ ve Sadrıaʻzam ile mükâtebeleri vukūʻ bulup, murahhaslar taʻyîni ve mahall-i mükâleme tahsîsi karâr bulmuşidi. İşbu Zilhicce'nin yigirmi dördüncü Çehârşenbih günü [114a] Ordu-yi hümâyûn'da tevkīʻi olan Hakkı Beyefendi Murahhas-ı Evvel ve Ordu Kadısı 'İsmet Beyefendi, Sânî ve Râtib Efendi, Sâlis nasb olunup, huzûr-ı Sadrı's-sudûr'da birer sevb-i ferve-i semmûre ile karîn-i ihtizâz u hubûr olmuşlar idi. Ziştovi mükâlemesinde ibrâz-ı me’âsir-i cemîle eden murahhasların Rûsiyyelü ile vukū‘ bulacak musâlaha mükâlemesinde bulunmaları taraf-ı vâzıhü'ş-şeref-i Mülûkâne'den irâde ve Ordu-yi hümâyûn'da nasb olunan murahhasların me'mûriyyeti ilgā vü iʻâde olunup, kemâ-fî'l-evvel Re’îsülküttâb es-Seyyid ‘Abdullah Efendi, Murahhas-ı Evvel ve ʻİsmet Beyefendi, Sânî nasb olunup, Ziştovi mükâlemesinde Murahhas-ı Sâlis olan Dürrî Efendi'nin mezâyâ-yı hudûda vukūfu emr-i beyyin olduğuna binâʼen, Âsitâne-i saʻâdet'den kat‘-ı hudûda taʻyîn ve on bin guruş harc-ı râh ile mesârifât-ı zarûriyyesi tehvîn olmuşidi. Beylikçi Odası'nda iken Rûsiyyelü'nün ʻahid-nâmeye dâyir olan defterleri yedinde olup, kuyûd u şürûta vâkıf ve sefer-i sâbıkda mütâreke-i ûlâde ʻAbdülkerîm Efendi maʻiyyetinde Mükâleme Kâtibi olup, bu mülâbese ile evzâ‘-ı mübâheseye ʻârif olduğundan gayri Ziştovi mükâlemesinde dahi tahsîl-i mahâret eylediği rüfekāsı tarafından telmîh ile hâst-kâr-ı mürâfakat olmalarıyla, meʼmûriyyet-i ûlâsı sarf ve Üçüncü Murahhaslık ile Rûsiyye mükâlemesine ʻatf olunup, sâbıkā Yeniçeri Kâtibi olan ʻİsmetî İsmâ‘îl Efendi Bosna tarafına muhadded nasb olunup, Miʻmâr-ı sabık Hafız Efendi dahi terfîk ve Ada ve Hırşova hudûdunun katʻ u terfiki sâbıkā Mâliye Tezkirecisi ʻAbdullah Efendi'nin gerden-i sadâkatına taʻlîk olundu.