İşbu musâlaha iktizâsıyla Nemçelü'den istirdâd olunan Eyâlet-i Belgrad'ın muhafazası ve etrâf u eknâfda olan reʻâyânın isticlâb u istimâlesi emr-i mühimm ve bu mülâbese ile bir vezîr-i sütûde-tedbîrin ol havâlîde bulunması muktezâ vü lâzım olduğuna binâʼen, Silistre Serʻaskeri olan Vezîr Bekir Paşa ‘âlim ü fâzıl ve müdebbir ü ‘âkil, şecî' ü cesûr, gayûr u vakūr bir vezîr-i kâmilü'ş-şu‘ûr olup, hıdmet-i mezkûrenin 'uhdesinden geleceği müsteban ve evâsıt-ı Zilhicce'de Belgrad Muhafızlığı müşârun ileyhe tevcîh ü ihsân ve müteferri‘ât-ı meʼmûriyyeti dîger emr-i şerîf ile tarafına ifâde vü beyân olundu. Rûsiyyelü ile vukūʻ bulan mütâreke hasebiyle Ordu-yi hümâyûn'da bulunan vüzerâ-yı ‘izâmın birer mahalle taʻyîn olunmaları lâzım gelmişdi. Binâ’en-‘alâ-zâlik Vezîr Hasan Paşa Silistre muhafazasına tesbîl ve birkaç günden sonra iktizâ-yı vakt hasebiyle meʼmûriyyeti Bükreş'e tahvîl olundu.