Bu ʻahid-nâmeden başka tarafeyn murahhasları miyânında yedi şart mukāvele vü ʻahid-nâme-i uhrâ yazılup, murahhaslar maʻrifetiyle mübâdele olundu. Şürût-ı mezkûreden mefhûmu ʻahid-nâme-i ûlâda ʻalâ-tarîkı'l-icmâl mestûr olup, îzâha muhtâc bir iki şart olmağla tezyîl münâsib görüldü. Irşova-i ʻAtîk Kasabası ve Çerna suyuna varınca erâzîsi Nemçelü'ye terk ve nehr-i mezkûr hudûd-ı [111b] cânibeyni fâsıl olup, istihkâmâtdan hâlî olmak ve Ada Kalʻası mukābilinde vâkiʻ küçük eve iki devlet tarafından metrûk ve hâliyetü'l-hâliye kalup, zirâʻat içün şahs-ı vâhide ruhsat verilmeye ve şarta merbût olan haritada sürh ile tersîm olunduğu vech üzere Galita Nehri'nin sâhil-i yemîninden şürûʻ ile Çetin Kazâsı Nemçelü'ye terk olunup, haddi dahi o tarafda olan nehr-i sagīrin doğruluğuna medd oluna ve haritada sarı renk ile beyân olunan İstorlik yâhûd İstorliç nâm Devlet-i ʻaliyye kıtʻası enhâsında hatt çekile. Bu vechile kalʻa-i mezkûre ve top mesâfesiyle tasrîh olunacak enhâsı Devlet-i ʻaliyye tasarrufunda ve andan hatt-ı mezkûr ile doğru yoldan Forana üzerine varılup, nehr-i mezbûrun akındısıyla hilâfen Dreznik Kazâsı'yla Nemçelü'de kalmak üzere gidile. Baʻdehû hatt-ı mezkûr İzmolyanac Dağı'ndan ve Niku nâm mahalden tahdîd oluna ve andan ol tarafda vâki‘ yüksek dağdan geçirile ki, cebel-i mezkûrun eteğinde haritada sarı ile işâret olunan Layaz nâm mahalli mevcûddur ve sarı ile işâret olunan vakfdan yukarı bir sâʻat mesâfe nehr-i Una sâhiline varınca çekile ve andan hatt-ı mezkûr nehr-i Una'nın sol yakasını çıkarak garb tarafında vâki‘ menbaʻa dek sürh ile işâret olunan hatt üzere varılup, yüksek dağların hizâsıyla en doğru yoldan hudûd-ı sülüse-i hâliyeye müntehî ola. Şöyle ki [isterse] ehl-i İslâm ister[se] nicesi Devlet-i 'aliyye'nin tasarrufunda terk oluna ve Devlet-i ‘aliyye tarafından terk olunan kazânın bi'l-cümle mesafesinde müceddeden binâ vü istihkâmât inşâ etmeye ve Devlet-i [112a] ‘aliyye'den Nemçelü'nün muhârebe esnasında aldığı kılâʻ vu palanka vü kastelleri el-hâletü hâzihî bulunduğu istihkâmât-ı cedîde ile Devlet-i ‘aliyye'ye terk edüp müceddeden binâ eyledikleri mahalleri hedm eylemeye. Ve bi'l-cümle Eflak memleketi ve Boğdan'ın beş kazâ yeri otuz bir gün murûrundan sonra ve sâyir mahaller altmış bir günden sonra Devlet-i ‘aliyye'ye teslîm oluna.