Birinci mâdde Devleteyn beyninde vâkiʻ olan muhârebe refʻ ve iki tarafın mücrimleri ʻafv ve tarafeyne bi'l-irâde tâbiʻ olanlara sûret-i menʻ gösterilmeyüp, havf-ı cân ile gürîzân olanların ʻavdet edenlerine imtiyâzât-ı sâbıka ve emlâk-ı kadîmeleri verilüp, vatanlarında ikāmet etmek câyiz ola. İkinci mâdde Elli iki senesinden işbu muhârebe evveline gelince beyne'd-devleteyn cârî olan ʻahid-nâmeler merʻî ve istatüsko isterkat taʻbîrinin hükmü işbu musâlahanın esâs-ı müştereği ola. Üçüncü mâdde Garb Ocağları'nın Nemçe sefâyinine taʻarruzların vukūʻunda hasâretleri Devlet-i ʻaliyye tarafından tazmîn ve bi'l-cümle bihâr u enhârda Nemçelü'nün sefâyini li-ecli't-[110b]ticâre geşt ü güzâr edüp, Erdel çobanlarının ve istishâb eyledikleri ağnâmın[ı] Eflak ve Boğdan maʻâbirinden murûr ve ikāmetleri zımnında mukaddemâ Devlet-i ʻaliyye tarafından verilan hükm-i şerîf-i kemâ-kân merʻî ola. Dördüncü mâdde İşbu muhârebede Nemçelü tarafından zabt olununan kılâʻ vü erâzî istatüsko isterkat şartıyla Devlet-i ʻaliyye'ye redd olunup, hudûd-ı kadîme ibkā ve âlât-ı harbiyye olarak Nemçelü'nün zabtında olan mühimmât ʻalâ-hâlihâ Devlet-i ʻaliyye'ye istirdâd oluna. Beşinci mâdde Hotin Kalʻası ve kazâsında vâkiʻ reʻâyâ-yı Rûsiyyelü ile sulh tanzîm olununcaya dek ber-veche-i emânet Nemçelü tarafında kalup, Rûsiyyelü'ye vechen mine'l-vücûh iʻânet ü imdâd eylemeyeler. Altıncı madde Tasdîk-nâmeler mübâdele olunduğu gibi otuz bir gün hesâbıyla tahliye-i erâzî olunup, istatüsko isterkat mefhûmu üzere bu sene Sırp memâlikinin ve etrâfıyla Irşova-i ‘Atîk'in hudûdu ibkā olunup, istihkâmât-ı cedîde hedmi ve nakl-i mühimmât maslahatı içün Una Nehri tarafına meʼmûr olanlara iki mâh müddet tahsîs oluna. Yedinci mâdde İşbu muhârebe sebebi ile tarafeynden kayd-ı esre giriftâr olan envâ‘-ı halk bilâ-bedel yek-dîgere teslîm olunup, şeref-i İslâm ile mümtâz olanlara tenassur edenlere mutâlebe sebebi ile müdâhale olunmaya. Sekizinci mâdde Seferden mukaddem yâhûd sefer vaktinde cânib-i âharın erâzîsine çekilmiş ve kabûl-i raʻiyyet etmişlerin rızâlarıyla diledikleri tarafda ikāmetleri câyiz olup, iʻâde taleb olunmaya ve emlâkları fürûht olunmak câyiz ola. Dokuzuncu mâdde Tarafeyn tüccârı miyânında kable's-sefer yâhûd sefer vaktinde cereyân eden muʻâmelâtdan nâşî bâkī kalan hukūk muktezâ-yı şer‘ üzere hükm olunup, hakkı olanların hakkı alıverilüp, vaktin mürûrunu ve seferin hulûlünü ‘illet eylemeyeler. Onuncu mâdde Devleteyn hudûdunda bulunan zevâbıt nizâm-ı sulh ü âsâyiş-i tarafeyn mekāsıdıyla muhâfaza-i hudûd edüp, gāretden [111a] vikāye ve vukūʻ bulan zarar kendülerinden tazmîn olunacağını ifâde ile mütenebbih olmayanların cezâ-yı mâ-yelîkleri ne ise icrâ oluna. Onbirinci mâdde Tarafeyn tüccârı hudûd-ı tarafeynde emîn ü mu‘temed olup, iki devlet memâlikinde bahran ve nehren seyr ü hareket ve serbestiyyet üzere ticâretleri câyiz olup, hudûd muhâfazasına meʼmûr u muʻayyen olanlar o makūle tüccârın murûr u ‘ubûrlarına mâni‘ olmayup, rusûmât-ı muʻayyeneden gayri bir şey mutâlebe olunmaya. Onikinci mâdde Devlet-i ʻaliyye memâlikinde olan ʻÎsevî râhiblerin ve tâbiʻlerinin âyînleri icrâsında kenîsâlarının taʻmîrinde ve Kudüs-i şerîf ve ziyâretgâh-ı sâyirelerine gidüp gelmelerinde mümânaʻat gösterilmeyüp, imtiyâzât-ı sâbıkaları ibkā oluna. Onüçüncü mâdde Elçiler hakkında rüsûm u teşrîfât icrâ olunup, hukūk-ı milele ʻayid olan cemîʻ imtiyâzât haklarında merʻî ve kable's-sefer soyılan ulağların emvâl-i magsûbelerini tahsîl içün saʻy u himmet ve fîmâ-baʻd âmed-şüd eden Nemçe ulaklarının âminen ve sâlimen iyâb u zehâblarına müsâʻade-i devlet tecvîz oluna. Ondördüncü mâdde İşbu ʻahid-nâme mutavassıt bulunan elçiler maʻrifetleriyle baʻde'l-mübâdele muʻâhid olan cânibeyn devletlerine irsâl oluna.