Ziştovi Kasabası'nda murahhasların ictimâʻı ve mukâlemeye şürûʻ ile Nemçelü'nün ru‘ûnet ü imtinâʻı vürûd eden suver-i mukâlemeden maʻlûm olup, su'ûbet-i mevâdd hasebiyle Nemçe murahhasları Bükreş'e ‘azîmet ve Devlet-i ‘aliyye murahhasları Ziştovi'de ikāmet ve bir müddetden sonra ikdâm-ı vesâyit ile tehvîn-i maslahat olunup, Ziştovi'ye tekrâr ‘avdet etmişleridi. Rızâ-yı cânibeyn ile mahall-i nizâʻ olan mevâdd taʻdîl ve on sekiz meclisde makālât u münâkaşât-ı mukâleme tekmîl ve işbu Zilhicce'nin üçüncü günü on dört şart üzere ‘akd-i musâlaha olunduğu haberi Ordu-yi hümâyûn'a vâsıl ve dağdağa-i teşvîş-i kulûb-ı nâsdan zâyil oldu. Nemçe mukâlemesine meʼmûr-ı Devlet-i ‘aliyye murahhasları hakkında bir nevʻ mükâfât-ı matlûb-ı Şehriyâr-ı sütûde-sıfât olmakdan nâşî Baş-murahhas olan Re’îsülküttâb es- Seyyid ʻAbdullah Efendi'ye on kîse ve sânî vü sâlise beşer kîse senevî îrâd ihsân olunup, bu vesîle ile mahsûdü'l-akrân ve mahfûf-ı ʻavârif-i bî-hadd ü pâyân oldular.