Muktezâ-yı vakt ü hâle nazaran inʻikâd-ı mütâreke vü esâs mahz-ı hayr olup, vakt ü zemân müsâ'id iken tanzîmine ikdâm olunmak husûsu ân-be-ân Vezîr Bekmezci Mehmed Paşa tarafından igrâ vü teşvîk olunur idi. Vaktâ ki ittifak-ı cümle ile maslahata nizâm verilüp, temessükler Sadrıaʻzam tarafından temhîr olunundu. Vüsʻat-i sadr ile İbrâ'îl cânibinde olan ordusuna vusûl, Nazm: Ve izâ mâ-hale'l-cenânû bi-arzin Talebe et-ta'ne vehdehu ve'n-nizâlâ. mefhûmu üzere ordusunda bulunan eʻâlî vü esâfil-i nâsa: "Sad-hayf-1 rûz mesârif u sitîz içün teşhîz ü tîz eylediğim şemşîr-i sâʻika-bârımı vücûd-1 aʻdâ ile hûn-âlûd etmeden mukaddime-i musâlaha sûret-yâb-ı husûl oldu" deyü sîne-kûb-ı endûh u te'essüf ve lâf-zen-i meydân-ı tesallüf olmuşidi. Vaktâ ki, esâs u mütâreke temessükleri Kalas Karyesi'nde Rûsiyyelü ile mübâdele olundu, iki devlet ‘askerinin şükrâne-i selâmetleriyçün Rûsiyye Cenerali top şenliği sipariş edüp, tahmînen yüz kadar top atmışlar idi. Müşârun ileyhin meterisinde olan piyâdeler âheng-i ceng ihtimalini verüp: "Kâfir basdı" diyerek İbrâ’îl Kal‘ası'na ‘azîmet ve müşârun ileyh dahi ircâ‘-1 ‘asker sûretinde hayli menzil katʻ edüp, keyfiyyeti Sadrı‘azam tarafına tahrîr ü işâret ve bu haber Maçin meterislerine münʻakis olup, kazıyye-i tebdîl-i mekân anlara dahi sirâyet edüp, orta çadırlarına duhûl eyledikleri kibâr-ı kavmin maʻlûmu oldukda cümlesi mütehayyir ü hâyim ve bu gayretsiz ‘asker ile mukāvemet-i hasm mümkin olmadığına câzim oldular. Ola ki muhavvelü'l-ahvâl ve'l-kulûb ve ‘avf-künende-i seyyi’ât ü zünûb-ı Pâdişâh-ı gayret-kîş ve Şehriyâr-ı ‘adâlet-endîş hazretlerinin te'yîd-i dîn ü devlet niyyet-i hâlisesiyle cilve-ger-i mücellâ-yı bürûz olan tedbîr-i dil-pezîrini muvafık-ı hüsn-i takdîr ve nizâm-1 ‘asker ve tertîb-i mühimmât-ı leşker mekāsıdını teysîr ile rikāb-ı a‘dâda olan sâr u intikām-ı İslâm'ı ahza kudret ihsân ve zühd-i bârid ve taʻassub-ı fâsid ile himmet-i kûh-efgen-i Hüsrevâneleri'ne îrâs-ı fütûr u istirhâ eden erbâb-ı temvîh ü tezvîri leked-hûrde-i mezellet ü hevân eyleye, amîn!