Meded-kârî-yi hazret-i Bârî ve nîrû-yi himmet-i cenâb-ı Şehriyârî ile Hırsova sahrâsında cem‘-i zehâyir ü mühimmâta sarf-ı makdûr ve birkaç gün zarfında imkân-ı tedârik hâtıra hutûr etmemiş iken meysûr olur, 'asâkir-i müteferrikanın baʻzısı dahi fikr-i encâm-kâr ile Ordu-yi hümâyûn'a râci‘ vü ‘âyid ve buʻd-ı mesâfe takrîbi ile maʻreke-i ûlâyı müşâhede etmeyen bekāyā-yı ‘asker-i mürettebe [107b] dahi o hılâlde vârid olduklarına binâ’en, vakt ü zemânda müsâʻade ve fi'l-cümle isti‘dâd-1 harb müşâhede olunup, hemân Zilka‘de'nin on yedinci günü sunûf-ı ‘asâkir-i İslâmiyye ile Maçin'den hareket ve kasd-ı a‘dâ ile hasr-i sâ‘id-i gayret olundu. Yevm-i mezkûrda Daye Karyesi makarr-ı leşker ve ferdâsı Yeniköy kurbunu madrab-ı hıyâm-ı ‘asker olup, karye-i mezkûre pîş-gâhında kānûn-ı Devlet-i ebed-müddet üzere meteris hafr olunup, 'ale's-sabah Maçin'e varıldıkda piyâde 'askerinin kılleti ve Yeniçeri'nin rehâveti takrîbi ile meteris hafrinde ‘azîm meşakkat çekilüp, hattâ Ordu-yi hümâyûn'da mevcûd olan beldârlara ihtiyac mess edüp, Sadrıaʻzam tarafında vâfir mebâliğ i‘tâsıyla tahsîl-i teʻâvün olundu.