Ordu-yi hümâyûn'un Hırsova'dan hareketi tehakkukunda Arnabud ile Yeniçeri miyânında ihtilâf-ı kelime ve şikāk ihsâs olunup, ahadü-hümâyı âhardan tefrîk savâb-dîd-i ehl-i tedkīk olduğuna binâʼen, Rumeli Vâlîsi Vezîr Mustafâ Paşa'nın mukaddemâ ihrâz eylediği Ordu-yi hümâyûn Serʻaskeriliği 'unvânı takrîr ü ibkā ve Dâye Karyesi'ne doğru râyet-güşâ olmak gûş-i hûşuna ilkā ve Hırsova'da olan Arnabud 'askeri sevâdd-ı cemʻiyyetine zamm olunup, işbu Zilka'de'nin on altıncı günü müteveccih-i semt-i a‘dâ olmuşidi. Hırsova'dan tahmînen beş on dakīka infisâlinde 'illet-i insıbâb ile binâ-yı hayatı harâb ve mütevârî-yi hicâb-ı türâb olup, mansıb-i me'mûriyyeti hâlî kaldığından inzimâm-ı rütbe-i vezâretle bi'l-fi‘l Yeniçeri Ağası olan Bekmezci Mehmed Paşa'ya Rumeli Eyâleti ve Ordu-yi hümâyûn Ser‘askerliği tevcîh olunup, mukaddemâ Maçin'de gayret ü hamiyyeti meşhûd olan Kūl Kethudâsı esbak Süleymân Ağa'ya Yeniçeri Ağalığı hilʻati iksâ ve ‘Abdî Paşa Deli-başısı Türkmanoğlu İsmâʻîl Ağa'nın başında vâfır deli ictimâ‘ ve nâm-dârlığı istimâʻ olunmağla yevm-i mezkûrda Mîr-i mîrânlık tevcîhi ile kevkeb-i bahtı ilmâ‘ olundu.