Karadeniz Donanması'na Pâdişâh-ı gayûr bezl-i makdûr ve mühimmât ve 'asâkirine bi'n-nefs nezâret ile saʻy-ı mevfûr buyurub, müsteʻînen billâh Kapudan-ı deryâ Vezîr Hüseyin Paşa boğazdan çıkup, deryâya açılmışidi. Müsâʻade-i rûzgâr ile Anapa semtlerine şirâ‘-güşâ ve istîlâ olunduğunu tahkīk ile a‘dânın mecma‘-1 merâkibi olan Evlita Limanı'na doğru ref-i livâ ve düşmenin donanması dahi limandan hurûc ile müterassıd-1 cenk ü vegā olup, iki taraf donanması yek-dîgeri müşâhede ve bâzâr-ı cenge revâc-dâde olmak içün müheyyâ vü îstâde olmuşlar iken vesîle-i cery-i sefâyin olan hevâda sükûnet zâhir ve tarafeyn birbirine uzakdan nâzır ve o hılâlde düşmen tarafından rûzgâr hübûb ve bu cihetle mübâşir-i hurûb olmak melhûz iken donanmasında [106a] kusûr hasebiyle cenge cesâret edemeyüp, Evlita Limanı'na duhûl ve Kapudan Paşa dahi liman-ı mezkûr ağzına vusûl ile aʻdâyı cenge da'vet ve hasm-ı bed-tıynet izhâr-ı ‘acz ile irâʼet-i sûret-i ‘adem-i mukāvement ve bilâhare kıllet-i mâden nâşî, Vezîr-i müşârun ileyh ‘avdeti tasvîb ve Kiligra pîş-gâhına gelüp, keyfiyyet-i 'adâyı teftîş ü tenkīb ve nâ-gâh düşmen-i mekîdet-mezâk verâsından gelecek sefînelerini cemʻîyetine ilhâk ve muvâfık rüzgâr ile Evlita Limanı'ndan çıkup, Kiligra'ya karîb mahallere geldiğini Donanma-yi hümâyûn talîʻası fark edüp, Kapudan Paşa'yı fi'l-hal haber-dâr eylediler. Müşârun ileyh mehmâ-emken Donanma-yi hümâyûn'a nizâm verüp, işbu Zilhicce'nin onuncu günü istikbâl-i aʻdâ sûretinde 'azm-i semt-i deryâ ve yoluyla cenge mübâşeret olunmasını kapudanlara îsâ edüp, rüzgâr donanma-yi aʻdâya müsâ‘id bulunduğuna binâ'en, Kapudân Paşa dahi rûzgâr üstüne çıkmağa kāsid olduğu hâlde beyne'n-nâs fart-1 şecâʻatle sütûde olan Seydî ‘Ali Kapudan'ın 'inân-ı ihtiyârı rübûde olup, râkib olduğu Kapudane-i hümâyûn ile sefâyin-i aʻdâya hücûm sadedinde olduğu ma'lum oldukda, münferinden düşmen donanmasına hücûmun hatar u zararı mütehakkıku'l-vukūʻ olduğu baʻzı işârât-ı irâ'esiyle ifade olunup, mûmâ ileyh ‘adem-i isgā ve dâhil-i mecma‘-ı sefâyin-i aʻdâ olup, cenge ibtidâr ve sefînesinden bir defa âteş verüp, donanma-yi aʻdâyı rahne-dâr ve vâfir melâ‘îni îsâl-i derekât-ı nâr edüp, düşmen dahi Kapudane'nin infirâdını mahz-ı fursat ‘addiyle fi'l-hâl ihâta vü istîʻab ve taraf taraf darb-1 top ile Kapudane'yi berhemzede-i inkılâb ve fikdân-ı iʻânet-kârân ile derûnunda bulunan dilâverân-ı İslâm'ı giriftâr-ı çâr-mevce-i iztırâb eylediklerini sâyir kapudanlar bi'l-muʻâyene tahkīk ü tahlîs dâʻiyeleriyle ahadü-hümâ âharı igrâ vü teşvîk ve nehengân-ı bahr-ı harb olan kapudanlardan Şermetoğlu ve sâyirleri cesârete [106b] gelüp, Paşa ile hem-dest-i muvâfakat ve düşmen gemilerine âteş-efşân-ı celâdet ve Kapudane'yi Kerç'e reh-yâb-ı semt-i selâmet eylediler. Ancak şedâyid-i muhârebeden nâşî sefâyin-i İslâmiyye'de ve bâ-husûs Kapudane'de rahne vü selme hâsıl ve bî-tertîb ü nizâm bulunduklarından düşmeni gāfil avlayub, kānûn-ı muhârebe-i bahriyye üzere cenge hâyil ve bi'z-zarûre Donanma-yi hümâyûn kapudanları def-i sâyil ederler iken şâm-ı zalâm miyânede had-i fâsıl olup, ‘asâkir-i cânibeyn terk-i rukād ve muntazır-ı vakt-i bâmdâd ve 'ale's-seher Seydî 'Ali Kapudan cürhüne müdâvât ve taʻmîr-i sefîne ve celb-i mühimmât kasdıyla imâle-i sükkân ‘avdet ve sâyir rahne-dâr olan sefâyini dahi kapudanları alup, Kapudane'ye tebaʻiyyet ve Kapudan Paşa dahi taʻmîr-i sefâyin mekāsıdıyla mahall-i maʻreketden infisâl ve boğaz açıklarında muntazır-ı encâm-ı hâl olduğu peyâmı vahset-endâz-ı kulûb-ı emcâd u enzâl olmağla der-ân sâʻat Asitâne'den boğaz muhafazasına sevk-i mühimmat u 'asker ve donanmanın dahi duhûlüne ruhsat-ı Mülûkâne mukarrer olup, şöyle ki donanmada olan kusûr u küsûr bir ân akdem taʻmîr ü tekrâr-ı düşmen ile tarh-ı kurʻa-i dâr u gîr olunmak zımnında meʼmûrlara hitâben ısdâr-ı ahkâm ve tebyîn-i mûcibât nakz u ibrâm kılınup, düşmen-i ‘ahd-şiken dahi meydânı hâlî bulup, "Emine Burnu" demekle maʻrûf mahalle lenger-endâz vusûl ve rahne-dâr olan sefînelerini i‘mâra ve mecrûhlarını timâra meşgul oldu.