İşbu Şevvâl'in on üçüncü Salı gecesi Moskov tabûru Tolçi'ye mürür edüp, Kalas tarafında olan donanması dahi Tolçi'ye götürdüğünü Kuban Hânı tahrîr ve derhâl meclis-i meşveret ‘akd olunup, Ordu-yi hümâyûn'da mevcûd vüzerâ-yı ‘izâm ve sâyir huddâm 'atebe-i Şehriyâr-ı vâlâ-makām vakt ü hâle münâsib idâre-i kelâm akabinde Ordu-yi hümâyûn'un mukābele-i aʻdâ-yı li'âm niyyeti ile Kozluca'dan hareketini tasvîb ve Bâzâr günü Ağa Paşa ve sâyir tavâyif-i 'askeriyye birer gün tefâvüt ile hall-i hirâm-ârâm eyledikden sonra, Sadrıaʻzam dahi bâkī-yi ‘asker-i zafer-peyker ile Çehârşenbih günü verâlarından nehzat etmek üzere tertîb olundu. Şehr-i mezkûrun on yedinci günü Babadağı Serʻaskeri Ahmed Paşa'dan tahrîrât gelüp, düşmen-i dîn Tolçi'den Babadağı üzerine sevk-i müşrikîn edüp, süvâriyân-ı İslâm iki sâʻat kadar şedâyid-i muhârebeye iftihâm ve galebe-i düşmen takrîbi ile süvârîler meterislere doğru 'avdet eder iken, piyâdeler bî-ceng ü peykâr meterisleri bırakup, firâr eylediklerini işʻâr ve Babadağı'nda mevcûd olan vüzerâ vü zâbitân istikrâr-ı sunûf-ı ‘askerî zımnında sarf-1 tâb ü tüvân etmişler iken müfîd olmayup, Karasu'ya doğru ve misâl-i nehr-i tîz-revân cereyân eyledikleri beyân olunmağla tekrâr meşveret olunup, bir ân akdem Bâzârcığa ve iktizâsına göre dahi ilerülere teveccühün lüzûmunu zebân-âver-i beyân ve bu niyyetin icrâsı içün Fatiha-hân oldular. Bir günden sonra Hân tarafından bir dîl götürdülüp, istintâk olundukda a‘dâ Babadağı Ordusu'nu tefrîk etdikden sonra Maçin'e ‘azîmetini takrîr ve Babadağı Serʻaskeri'nin dahi çukadârı gelüp, düşmen bî-‘ahd ü mîsâk Babadağı'nı ihrâk ‘akabinde geldiği semte gitdiğini tezkîr ve mâ-beyne'l-habereyn tevâfüt bulunduğundan, fi'l-hâl bir meclis-i hâssü'l-hâs tertîb ve bi'n-nefs [96b] Sadrıa'zam ve Serdâr-1 ekrem'in hareketi tasvîb olunup, Kozluca'ya altı sâʻat mesâfe olan Bâzârcığ'a bir günde ‘azîmetleri tasmîm ve aʻdânın ne tarafa hareketi maʻlûm olmak içün Rumeli Vâlîsi'nin Karasu'da ikāmeti tefhîm olunmuşiken düşmenin Babadağı'ndan ref‘-i kâr-bâr-ı sıklet edüp, Maçin'e doğru 'azîmeteti tekarrür eylediğine binâʼen, müşârûn ileyhin meʼmûrriyet-i kadîmesi tecdîd ve Maçin'e ve ba‘dehû İbrâ’îl'e murûr eylemesi tenbîh ü te’kîd olundu. Salı günü Sadrıaʻzam ve sâyir vüzerâ Evşenli yurduna nüzûl etmeksizin Bâzârcık sahrâsına nasb-ı hıyâm ve kıllet-i miyâh u giyâh hasebiyle Yeniçeri Ocağı Bâzârcık'dan altı sâʻat ilerüde vâki olan Mûsâbey Karyesi'ne 'atf-ı zimâm eylediler. Bâzârcık sahrâsında kıllet-i mâdan zarûret çekileceği meczûm iken mukaddemâ hafrine mübâşeret olununan âbârın fâyide-i 'azîmesi müşâhede olunduğundan gayri, tavâyif-i 'askerî nüzûl eyledikleri mahalleri hafr ile vefâ eyleyecek derecelerde âb-ı lezîz tedarik eyledikleri mûcib-i suhûlet ve izdihâm ile tekevvün edecek şûriş ü gavgānın indifâʻna bâʻis ü ‘illet oldu. Her mâddeyi fikr-i sahîh erbâbı ile mukaddemce mülâhaza vü müşâvere etmekde nef-i sarîh husûlü bu defʻa dahi tecribet-güzâr-ı uli'l-ebsâr oldu. Bâlâda zikrolunduğu üzere Nemçelü'nün mekâyidinden hıtta-i İslâmiyye'yi vikāye-i vâcibât-ı dîniyyeden olup, binâ-berîn Silistre taraflarına dahi bir Ser‘asker-i zafer-peyker tahsîsi müstahsen-i erbâb-ı elbâb olmağla, mâh-ı mezkûrun evâhirinde Vezîr Ebû Bekir Paşa cânib-i mezkûre Serʻasker nasb olunup, Serʻaskerlik levâzımı mehmâ-emken-ı tekmîl ve hareket ü ‘azîmetinde ta‘cîl olundu. Bundan sonra Mûsâbey Karyesi'nden nehzat olunup, Kurnalı ve Karasu ve Boğazköyü merâhiline ve andan Hırsova'ya nüzûl ve Hırsova sahrâsında iken Çapan-zâde Süleymân Bey'in [97a] istishâb eylediği ‘asker ile muʻasker-i hümâyûna vüsûl ve merhâle-i mezkûrede Yehûd tâyifesinden câsûs deyü tutulan şahs-ı mechûl maktûl oldu. Kuban Hânı ile umûr-ı seferiyye ve evzâ‘-ı harbiyye müzakere olunmak istisvâb ve beş on âdem ile tebdîl-i hey'et-i orduya isticlâb olunup, birkaç defʻa mecâlis-i şurâya idhâl olundukda Tolçi ve İsakçı istihkâm bulmadıkça İbrâ’îl tarafına murûr bâʻis-i hatar olduğunu tahkīk ve ekser nâs müşârun ileyhi tasdîk etmeleriyle, Rumeli Vâlîsi meʼmûr-ı maʻiyyeti olan 'asâkir ile İsakçı'ya ve Maçin Serʻaskeri Hasan Paşa Tolçi'ye ve Moralı Ahmed Paşa Taşburun muhafazasına tahrîk olunmak üzere karar verilüp, Karahisarî Ahmed Paşa dahi Hırsova Kalʻası'nı ve Hırsova'da terk olununan ordu bekāyâsını muhafazaya me'mûr oldu. Bir iki günden sonra aʻdânın Maçin tarafına ‘ubûr ile müterassıd-ı hücûm olduğu mütehakkık olduğundan, Rumeli Vâlîsi Maçin'e taʻyîn ve meʼmûriyet-i sâbıkası terkīn olundu. İşbu Zilka‘de'nin beşinci günü Hırsova'da meşveret vâkiʻ olup, Kalem-i Fakīr ile muharrer olan sâniha-i varak-pâresi Sadrıaʻzam lisânından olarak kırâ'at ve cümleden 'ahd alınup, zikrolunan sânihadan 'ibret alup, istifade olunacak kati çok fevâyid olmağla, tahlîd-i âsâr ve erbâb-ı tecribeye yadigar olmak sadediyle sebt-i sahîfe-i tezkâr olundu.