Nemçe murahhaslarının semere-i ta‘lîmât olarak bazı teklîfât îrâdları maslahat-ı musâlaha te’hîrini müstelzim ve eyyâm-ı mütâreke münkazıyye olmak [95b] hasebiyle şerîta-i hazm u ihtiyâta ri‘âyet-i emr-i mühimm olduğuna binâ'en, Nemçelü'ye mücâvir olan tuhûm u sügūrun muhafazasıyla lede'l-lüzûm a‘dâ üzerine hücûm içün bir Serʻasker nasbı kâr-âzmûdegân-ı zemân istihsân etmeleriyle, hâlâ Yergöğü muhâfazasında olan Vezîr ‘Osmân Paşa'nın bu hıdmet-i hatîreye ehliyyeti nümâyân olup, miyâne-i vüzerâdan intihâb ve tekmîl-i levâzım u esbâb ile menşûr-ı Serʻaskerî tarafına îsâl ve hîn-i iktizâda o havâlîde bulunan erbâb-ı harb u darb maʻiyyetine cemʻ olmak için lâzım gelan evâmir-i ‘aliyye dahi taraf taraf neşr ü irsâl olundu. Şevvâlü'l-mükerrem'in yirmi dördüncü günü Mîr-i mîrân-ı kirâm'dan Yanya Sancağı Mutasarrıfı Depedelenli ‘Ali Paşa süvârî vü piyâde altı bin mikdârı ‘asker ile Bâzârcık sahrasında dâhil-i mu‘asker-i hümâyûn olup, Arnabud tâyifesinin râcil bulunmaları şeʻâyir-i asliyyelerinden iken ekserisinin râkib bulunmaları meydân-ı harbde suhûlet-i firâra ve nehb eyleyecek emvâli tahmîl ve ‘adem-i karâra medâr-ı mülâhaza olundu ve "Vukūʻu'l-emri kemâ zekernâ". Karadeniz Donanması Kapudan Paşa maʻiyyeti ile boğazdan çıkup, Kiligra'ya gelmişidi. Muvâfık rûzgâr ile Kırım Adası'na doğru ve ‘azîmet ve a‘dâ donanmasını cust-cûya mübâderet edüp, ‘adem-i tesadüfden nâşî ke'l-evvel Kiligra'ya gelüp, lenger-endâz-ı ikāmet olduğu haberi Bâzârcık sahrâsında tevârüd ve kezâlik Tuna Donanması Kapudan Ahmed Paşa maʻrifetiyle Ruscuk'dan tahrîk olunup, levâzım-ı sâyiresini ikmâl içün Silistre'de birkaç gün ikāmete ve baʻdehû me'mûr olduğu mahalle seyr ü hareket niyyetinde olduğunu müşârun ileyh tahrîrâtında işaret edüp, tekmîl-i noksân ‘akabinde ruhsat-ı terâhî zemân vermeyüp, İbrâ'îl cânibine donanmayı tesyîr içün mü'ekkeden ve müceddeden tarafına irsâl-i fermân olundu.