Vezîr-i müşârun ileyh bir seneden [92a] berü bilâ-mansıb Tırhala ve Yenişehir taraflarında tedmîr-i eşkıyâ ve tathîr-i etrafı u enhâ ve Sol Kol'dan müretteb olan ‘askeri vaktinden evvel ihrâc ve Ordu-yi hümâyûn'a isrâ ve işbu Ramazân-ı şerîf evâhirinde bin beş yüz nefer kapu halkı ile Şumnu sahrâsına vürûd ve âlâyı gösterdikden sonra huzûr-ı Sadru's-sudûr'da telebbüs-i ferve-i semmûr ile nâyil-i hubûr olup, Makak sahrâsına darb-ı hıyâm ve Ordu-yi hümâyûn Ser‘askeri ve yâhûd Çerhacısı olmak vaʻdi üzere kesb-i ‘ulüvv-i makām eyledi. Hakk budur ki, çok zemândan berü böyle muntazam dâyire ile Ordu-yi hümâyûn'a bir vezîr gelmeyüp, âlây-ı dilârâsını seyredenler âvâze-i tahsîni resîde-i çarh-ı esîr ve intizâm-ı dâyiresini görenler "Sad bârekallâh" sitâyişini tekrîr eylediler.