Devlet-i 'aliyye'nin seferi mütehakkıku'l-vukūʻ oldukda, düşmeni olan Moskovlu'yu taraf-ı âhardan işgāl ile tahfîf-i şedâyid-i cidâl etmek mutâbık-ı kavâ‘id-i harbiyye olduğuna binâ'en, Moskov memleketine mücâvir olan ülkât hânlarından Buhârâ Hânı'nın fi'l-cümle kuvvet ü mikneti olduğu rivâyet ve ceht ü hiddet-i İslâmiyye takrîbiyle iʻânet ü müzâherete mübâderet eylediği hâlde tefrîk-i ‘asâkir-i a'dâya 'illet ü gāyile-i uhrâya giriftâr eyleyerek mûceb-i te'yîd-i dîn ü devlet olacağı mülâhaza olunup, hass ü igrâ siyâkında Hân-ı müşârun ileyhe taraf-ı hümâyûn'dan mahsûs nâme-i mülâtafet-mansûs ısdâr ve Van Muhâfızı cânibinden tisyâr olunmak savâb-dîd-i erkân-ı Devlet-i ebed-karâr olmuşidi. Muhâfız-ı müşârun ileyh nâme-i hümâyûnu Seyyid Mehmed nâm Tatar ile Îrân tarafından irsâl ve mahalline îsâl edüp, mazmûn-ı nâme-i kerâmet-‘allâme Hân-ı müşârun ileyhin maʻlûmu oldukda, Nazm: Halakallahu lil-hurubi ricâlen, Ve ricâlen li-gasʻatin ve serîdin. mefhûmu üzere tahsîl-i müstelezzât-ı nefsâniyyeyi erbâb-ı tevhîde farz [92b] olan gazve vü cihâda tercîh ve in‘idâm-ı kuvvet ü miknetini îmâ vü tasrîh edüp, iʻtizârât-ı gayr-i müveccehe ile Tatar'ı i‘âde ve Tatar-ı merkūm dahi tavîlü'z-zeyl bir takrîr ‘atebe-i Devlet'e nihâde etmekle [mısra]‘: Cihân-dîde bisyâr gûyed dorūg. me'âli üzerine sıhhat-i vukūʻu müştebih ü meşkûk olduğundan gayri fâyideden muʻarra vü mu‘teddün-bih olmıyan hurâfât u ekāsîs kabîlinden olduğu hüveydâ olmağla, mühmel ü metrûk bırakılması ûlâ görüldü.