Tavâyif-i ʻaskeriyyenin müstehakk oldukları bir kıst ʻulûfeleri Ordu-yi hümâyûn'da bundan akdem iʻtâ vü teslîm ve haklarında menâyih ü ʻatâyâ-yı Pâdişâh-ı heft-iklîm taʻmîm olunup, meşkûriyyet-i hıdmet-i Sadru's-sudûr zımnında teşrîfât-ı hümâyûn irsâli muʻtâd olduğuna binâ'en, işbu Ramazân-ı şerîf'in on altıncı Pençşenbih günü Kahveci-başı Hüsâm Ağa ma'rifetiyle taraf-ı vâzıhü'ş-şeref-i Mülûkâne'den cânib-i Serdâr-ı ekremî'ye bir sevb-i semmûr-ı fâyizü's-sürûr ve bir kabza mücevher-i şeref-resân vürûd olup, iʻlâm-ı hâl siyâkında nakş-tirâz-ı levha-i sudûr olan hatt-ı mevâhib-i mahsûr ʻalâ-mele’i'n-nâs kırâ'at olunduktan sonra, hâmil-i hatt-ı menâyih-nukat olan Hüsâm Ağa'ya bir sevb-i semmûr iksâ ve bir re's esb-i müzeyyen iʻtâ ve cenb-i hayme-i Sadrıaʻzamî'de nasb olunan hıyâma mûmâ ileyh ile etbâʻı îvâ olundu. Şehriyâr-ı mekârim-âsâr Serdar-ı ekrem'e olan teveccüh-i Mülûkâne'lerin iş‘âr-ı irâdeleriyle mu‘tâd olan teşrîfât-ı seniyyeden fazla yek-pâre Saʻîdî zümürrüd ile masnu ve takdîr-i behâsı cevher-şinâsân-ı rüzgârdan memnuʻ bir kutu serâpâ elmâs ile müzeyyen bir sâʻat-i girân-kıymet irsâl buyurduklarından gayri Râbiʻa-zehâdet, Zehrâ-'ismet ya'nî Vâlide Sultân-ı 'aliyyetü'ş-şân hazretleri tarafından dahi gayr-ez-muʻtâd birkaç kat mükemmel câme-şû u kân-ı cihânda misli nâdîde bir 'aded tesbîh Încü ihsân olunup, bu vesîle ile Sadr-ı vakūr nâyil-i etemm-i mübâhât ü surûr oldu.