İbrâ'îl serhaddinin muhâfazasına me'mûr tavâyif-i ʻaskeriyyenin bir mikdârı: "Vaktimiz rûz-ı Hızır'a dekdir" deyü firâra başladıklarından gayri Başbûğ ʻAbdî Paşa ve Muhâfız Mahmûd Paşa ve Yegen Paşa miyânelerinde münâfese vü münâkaşa tekevvünüyle serhadd-i hakānî muhtell olup, tavâyif-i ʻaskeriyyenin taht-ı râbıtaya idhâlleriyle emr-i muhâfazada devâm u istikrarları ve aʻmâl ü idârelerine akvâ-yı vesîle olan vüzerâ-yı ʻazâmın ittihâd-ı kulûb u ittifâkları vikāye-i memleket ve sükkân-ı vilâyete bâʻis-i itmînân u tesliyyet olacağı maʻlûm zevât-ı müteşahhısadan bir sâhib-i vukūf u nüfûzun bu hıdmete me'mûrriyeti beyyinü'l-lüzûm olmağla sâbıkā Sadrıaʻzam Kethudâsı el-Hâc Mehmed Hakkı Beyefendi işbu şehr-i Ramazân'ın dördüncü günü ol cânibe taʻyîn ve kāmet-i liyâkati hilʻat-i câh-ı refʻ-i Tevkîʻi ile tezyîn kılındığından gayri mâ-beyne'l-vüzerâ tehaddüs eden şikākı vifâka tebdîl ve sebât-ı ʻaskere dâyir olan vesâ’ili tahsîl etmek bâbında [91b] ısdâr-ı evâmir-i Cihân-mutâʻ ve Hırsova Serʻaskeri Vezîr Karahisârî Ahmed Paşa'ya telkīn içün baʻzı vesâyâ-yı Sadâret-penâhî dahi kûze-i hâfızasına îdâʻ olundu.