Nemçelü ile [90a] ‘akd-i musâlaha mukadder olduğu hâlde tîz elden Ordu-yi hümâyûn'da bir voyvodanın vücûdu ve derhal Eflak'a gönderilmesi emr-i mühimm olduğuna binâ'en, sabıkā Boğdan Voyvodası Aleksandra bundan akdem Âsitâne-i saʻâdet'den Ordu-yi hümâyûn'a vârid olmuşidi. Mersûmun bu hılâlde vazîfe-i zimmeti olan celb-i hafâyâ-yı ahbâr ve ıstıtlâ‘-ı ahvâl-i düşmen-i mekârih meʼmûl-ı Devlet-i ebed-müddet üzere fursat-yâb olamadığından gayri, bundan sonra idâre-i memleket ve celb-i ehl-i raʻiyyet edemeyeceği zevâhir-i ahvâlinden istidlâl olunup, yerine âharının celb ü istishâbı lâzım gelmişidi. Sâbıkā Eflak Voyvodası olan Mihalaki Voyvoda bir zemân Dîvân Tecümânlığı'nda izhâr-ı sadâkat, voyvodalığı vaktinde muhafaza-i memleket tahsîl-i rızâ-yı Devlet edüp, Avrupa ahvâline dahi vukūf u ıttılâʻı olduğu maʻlûm olduğundan, işbu evâsıt-ı Şa‘bân'da mersûm Ordu-yi hümâyûn'a gelüp, Eflak ve sâyir mahallerde olan a‘dânın ahvâline vukūf içün cevâsîs irsâli ve bu yârân u reʻâyânın istimâlet ü isticlâb olunmaları tedbîrâtı taraf-1 Sadru's-sudûr'dan mersûma tenbîh olundu.