Nemçelü'nün ‘akd-ı musâlahada zuhûr eden tüvânî vü terâhîleri ve Devlet-i 'aliyye murahhasları taraflarından itmâm-ı musâlahaya ibrâm olundukça leyte ve le ‘alle ile imrâr-ı vakte mübâderetleri ve müddet-i mütâreke münkazıyye olup, hıtâm-ı muhâdene mümkin olmadığı hâlde: "Üç dört mâh[a] temdîd-i vakt-ı mütâreke olunur" deyü Nemçelü murahhaslarının hezeyânları ve tatvîl-i mâddeden murâdları müttefiklerinin suhûlet-i maslahatlarını istihsâl ve Devlet-i 'aliyye'yi işgāl ile tevhîn-i havâtir ve teştît-i ‘asâkir olduğundan fazla, bidâyet-i emrde bilâ-mûceb nakz-ı ‘ahd eylediğine nazarân bu defa dahi 'ahdinde sâbit-kadem olmayacağı [90b] agleb-i ihtimâl ve şimdiden Nemçelü'ye mücâvir olan kılâʻ vü bikāʻı tarsîn ve baʻzı mahallere başbuğlar ve muhafızlar taʻyîn olunmak muktezâ-yı vakt ü hâl idügi ve Nemçelü'ün kāle getürdükleri dört mâh mütâreke-i cedîdede vucûd-ı mehâzîr vâreste-i iştibâh u zunûn ve müddet-i merkūma temâmce Devlet-i 'aliyye 'askerinin ‘avdetlerine ve serhadlerin huluvv ü ferâğı vaktlerine tesadüf eyleyeceği ve temdîd-i vakt i‘âde-i harbe tercîh olunduğu hâlde ihtiyâr-ı ehven-i şerreyn kā‘idesi üzere mütâreke müddeti sene- i kâmileye makrûn olmak zımnında Âsitâne-i sa‘âdet'de meşveret olunup, Ordu-yi hümâyûn'da dahi bu keyfiyyetin mülâhaza olunması murâd-ı hümâyûn olduğuna binâ'en, işbu şehr-i Şa‘bân'nın yirmi altıncı günü otâk-ı Serdâr-ı ekremî'de 'akd-ı encümen-i meşveret ve Âsitâne'den vürûd eden mazbata kırâʼat olundukda, mevâdd-ı mezkûreye dâyir beyne'l-huzzâr ebhâs-ı kesîre güzerân ve nihâyetinde li-ecli'l-ihtiyât Nemçelü'ye mütekārib olan mahallere sevk-i ‘asâkir ü ketâyib ve muhafaza-i etraf u cevânib olunarak düşmen-i ‘ahd-şikene irâ'e-yi kuvvet olunmak tasvîb ü istihsân ve müddet-i mütârekenin dört mâh temdîdi fi'l-hakīka Devlet-i ‘aliyye'ye muzırr olup, ancak itmâm-ı musâlaha niyyeti ile yigirmi ve gāyeti otuz güne dek meddin zararı olmadığı zebân-güzâr olmağla, işbu mülâhazât-ı vâride bir tarafdan Ziştovi'de ictima‘ eden Devlet-i ‘aliyye murahhaslarına ifâde ve bir tarafdan Nemçe koluna ‘asker ü mühimmât irsâliyle lede'l-hâce muhafaza vü mücâveze isti‘dâdı âmâde kılınmak üzere Hâcıoğlu Bâzârcığı'nda mukīm Vezîr Hasan Paşa Niş Muhafızı ve Kelleci ‘Osmân Paşa Yergöğü Muhafızı ve Moralı Silahdâr Ahmed Paşa Babadağı Ser‘askeri ve Anadolu Vâlîsi Vezîr İskenderiyyeli Mahmûd Paşa Vidin Ser‘askeri Vezîr Bicân ‘Ali Paşa Kulle Muhafızı nasb olunup, Vezîr Mehmed Emîn Paşa mukaddemâ Kiligra'ya [91a] eğerçi me'mûr olmuşidi. Ancak Bâzârcık Kasabası Varna ve sâyir mahallere karîb olup, tenhâ kalması münâsib olmadığından müşârun ileyh Bâzârcık muhafazasına taʻyîn olunup, Kiligra muhafazası dahi Mîr-i mîrân'dan Uzun 'Abdullah Paşa-zâde Nebî Paşa'ya ihâle ve maʻiyyetine bir mikdâr ‘asker ve harçlık irsâli dahi meclis-i meşveretde mukāvele olunup, meclise hitâm verildi.