Baʻzı erbâb-ı ‘ukūlden sübût-yâfte-i sıhhat-i nukūldür ki Arslan Paşa meydân-ı maʻrekeden sâlimen çıkup, ‘askerin verâsını almış iken, etbâʻından bir şahs-ı ‘âkıbet-bîn müşârun ileyhin ‘inân-keş-i ‘azîmeti olup: "Maçin Muhafızı olduğun hasebiyle sûret-i firârda tahlîs-i nefs eylediğini Devlet teyakkun eylediği takdirde, seni be-her hâl iʻdâm ve ser-i felâket-zedeni galtân-ı siyaset-gâh-ı enâm eder. Bu sûretde kayd-ı esri ihtiyâr-ı firârdan eslem ve muhafaza-i nefs cümleden akdemdir" dedikde müşârun ileyhe şahs-ı mezbûrun kelâmı te'sîr edüp, semt-i selâmeti tahsîl etmişiken mütereddid-i beyne'l-emreyn kalup, ru’esâ-yı ‘askerin baʻzıları "el-Firâru mimmâ lâ-yûtâku min-süneni'l-mürselîn" mefhûmunu müşârun ileyhe telkīn ve beş on etbâʻ ile kurb-ı aʻdâda bulunmasını tehcîn eylediklerinden gayri: "Dest-i a‘dâya vüzerânın giriftâr olması Devlet-i ‘aliyye'ye bir nevʻ nakîsayı müstelzimdir" dediklerinde mülzem olmayup, [88b] birkaç nefer etbâʻı ile tevakkuf u ârâmı ihtiyâr ve gerüden gelan aʻdânın giriftâr-ı kemend-i isârları olup, Seksoncu-başı dahi bu hâli müşâhede ve ol dahi mezellet-i esre rızâ-dâde oldu. Kilîd-i kalʻa-yı İbrâ'îl mesâbesinde olan Hırsova'nın tarsîn ü istihkâmı ve Maçin cânibine bir Ser‘asker-i kaviyyü'l-iktidâr taʻyîni vâcibât-ı umûrdan olup, istisvâb-ı ehl-i şûrâ ile Silistre Serʻaskeri Vezîr Karahisârî Ahmed Paşa miyâne-i vüzerâdan intihâb ve ol havâlîye Ser‘asker nasb olunup, maʻiyyetinde ihtișâd içün Ordu-yi hümâyûn'dan ve etrâf u eknâfdan vâfir leşker tertîb ve menşûr-ı Serʻaskerî ve ser-â-sere kablu hilʻat-ı zâhire-i Tâcdârî ve takviyye-i bâzû-yı iktidârî içün yigirmi bin guruş bu ‘abd-i ʻAciz ile ba's ü tersîb olunup, bir ân akdem me'mûr-ı maʻiyyetleri olan ʻasâkir ile vezîr-i müşârun ileyhin hareketi ve Hırsova'ya lede'l-vusûl tahsîl-i isti‘dâd edüp, Maçin cânibine teveccüh ü ʻazîmeti tahrîrât-ı ekîde-i Sadâret-penâhî ile dahi işʻâr olunduğundan gayri, Tuna Donanması Başbuğu Vezîr Ahmed Paşa bundan akdem inşâsına meʼmûr olduğu donanma sefâyini ile Maçin câniblerine bâd-bân-güşâ-yı ʻazîmet ve Serʻasker-i müşârun ileyh ile bi'l-muhâbere muktezâ-yı vakt ü hâle riʻâyet etmek bâbında tarafına hitâben misâl-i lâzımü'l-imtisâl ısdâr olunup, Baş-muhasebeci Sivasî Hasan Efendi me'mûriyeti ile tisyâr olundu. Bu Kemter-i bende-i devlet ile irsâl olunan teşrîfât u nukūd îsâl olunup, müşârun ileyh muhafız bulunmak takrîbi ile hayvânat u hıyâm ve sâyir levâzıma eşedd-i ihtiyâcı müşâhede ve derhal keyfiyyeti Ordu-yi hümâyûn'a ifâde ve lüzûmu olan eşyâ vü mühimmât mehmâ-emken tedârik ü ihzâr [89a] ve birkaç gün zarfında ʻunvân u dârât-ı Serʻaskerî ile müşârun ileyh Silistre sahrasına nâsıb-ı ʻalem-i vakār oldu. O esnada aʻdâ-yı dîn İbrâ'îl Kal‘ası'nı muhâsara içün Karavan nâm mahalden ihrâc eylediği ʻaskeri Kalas'da olan ince donanmasına ilhâk ve Devlet-i ʻaliyye tarafından def‘-i keyd-i a‘dâ içün İbrâ’îl karşusunda kâyin adada müceddeden binâ olunan tabyaya hücûm edüp, muhafazasına meʼmûr olan dilâverân-ı İslâm birkaç sâʻat i'mâl-i hisâm-ı ʻadüvv-intikām edüp, kalʻa tarafından imdâd ü iʻânet müteʻazzir olduğundan, ekserisi şerbet-i şehadeti nûş ve gamm-ı ʻâlemi ferâmûş edüp, bu mülâbese ile aʻdâ, zikrolunan tabyayı istîlâ ve kalʻa halkını inhisâr u müzâyakaya mübtelâ ve âlât-ı nâriyye ile baʻzı mahallerini tahrîb ü sûzân ve ehl-i İslâm dahi gerek kal'a ve gerek tabya cenginde vâfir küffârı refîk-i dûzâhiyân eylediklerinden gayri, üç beş kayıklarını garîk-i nehr-i hizlân ve bâkīlerini rahne-i top ile vîrân eyledikleri hasebiyle düşmen-i mekkâr tertîb-i mekr ü hîle zımnında ser-be-zânû-yı efkâr olup, zu'afâ-yı kalʻayı tevhîm siyâkında bir mektûb-ı keyd-üslûb tahrîr ve Maçin'de vukūʻ bulan keyfiyyeti tastîr ve el-yevm Hırsova'nın bile ‘asker-i İslâm'dan hâlî olduğunu beyân ve bilâ-muhârebe kal‘aya dest-res olur ise şahs-ı vâhide ziyân etmeyeceğini ifâde ile halkı teşvîşe ilkā ve taleb-i mühlete ilcâ eylediği istihbâr ve bu kazıyye fi'l-hâl Silistre'den Ordu-yi hümâyûn'a iş‘âr olunup, bu haber-i bârid taraf-ı Sadrıaʻzamî'ye vârid olduğu gibi dâyirelerinde mevcûd olan 'asker ile bi'n-nefs hareket ve Silistre'ye gelüp, Serʻasker Paşa ile tarh-ı kurʻa-i meşveret ‘akabinde müşârun ileyhin bekāyâ-yı müsted'iyyatını tekmîl ve niyâz-mend [89b] olduğu on beş bin guruşun i‘tâsıyla îrâd eyleyeceği 'özr ü behâneyi ta‘tîl edüp, hayme-nişîn olduğu mahalden Hırsova'ya doğru teveccüh ü ‘azîmet eylemesini fermân-ı müşârun ileyh dahi emr-i ‘alîye imtisâlen me'mûr olduğu mahalle 'atf-1 ‘inân eyledi. İbrâ'îl'den câ-be-câ ‘asâkir ü zehâyir mutâlebe olunduğuna binâʼen, baʻzı kazâlardan tertîb ve Serdâr-ı ekrem'ın Silistre'den hareketleri günü vürûd edüp, bin nefer dalkılıç Silistre sâhilinde cemʻ etdirilüp, râkib olacağları kayıklar ihzâr olundukdan sonra, cümlesi mazhar-ı nevâziş ü ikrâm ve ferden ferdâ dest-i Sadriaʻzamî'den nâyil-i ‘atıyye vü inʻâm olduklarından fazla muhtâc oldukları zehâyir merâkib-i mevcûdeye imlâ ve kalʻaya eşedd-i lüzûmu olan topçu ve humbaracı ve müstevfî zehâyir ü hazîne ve çeleng ile isrâ olunup Tuna Donanması Başbuğu'nun tedârikâtı nâ-temâm olup, ancak kethudâsını vâfir ‘asker ile irsâl ve anlar dahi Serʻasker Paşa ordusuna ilhâk u îsâl ve Babadağı tarafından dahi Maçin'e vâfir ‘asker gönderildiği haberleri aʻdâ-yı dînin mesmû oldukda kemâl-i perîşânî vü ıztırâb ile İbrâ'îl ve Maçin havâlîsinden firâr ve Kalas tarafına güzâr eyledikleri ve işbu tedâbîr ü harekât-ı müsta‘cele bi-hamdillâhi Teʻâlâ sebeb-i muhafaza-i kalʻa-i Pâdişâh-ı rub‘-1 meskûn ve mûcib-i rasânet-i sugūr u husûn olduğu ve Silistre'ye dahi Mîr-i mîrân'dan Hasan Paşa muhafız nasb olup, o tarafda olan umûr mûmâ ileyhe sipâriş olunduğundan gayri Silistre'de mukīm Kuğu-zâde Süleymân Paşa mukaddemâ Anapa'ya me'mûr olmuş olmağla, meʼmûr olduğu mahalle șitâb ve tahrîk-i rikâb etmesi taraf-1 Sadâret-penâhî'den lisânen tenbîh ü işrâb olunup, husûl-1 istihkâm-ı enhâ vü cevânib ‘akabinde Ordu-yi hümâyûn'a râci‘ vü âyib oldular.