[88a] Bu esnâda düşmen-i dîn nehr-i Tuna'yı berü tarafa geçüp, mukābilinde olan üç beşyüz mikdârı mübarizân-ı ehl-i İslâm ile muhârebeye kıyâm eyleyerek Maçin'e hücûm ve kasaba-i merkūmede bulunan Vezîr Halîl Paşa ve Vezîr Arslan Paşa ve Seksoncu-başı ve ekall u kalîl Yeniçeri neferâtı ‘âr-ı firârı irtikâb etmeyüp, tâkatleri yetişdiği kadar mukāvemet ve bilâhare neferât-ı merkūmenin bir mikdârı lâbis-i gül-gûn-câme-i şehâdet ve Arslan Paşa ve Seksoncu-başı ve birkaç kıtʻa top ve bir mikdâr mühimmât giriftâr-ı dest-i aʻdâ-yı bed-tiynet olduğu ve ‘avdet eden ‘asker Hırsova'ya gelüp, dekâkîn-i mesâkîni intihâb ve mîrî zehâyirini itlâf u igtisâb ve ‘adem-i istikrâr ile Rasvat ve sâyir mahallere müteferrik oldukları peyâmı etrâfdan Ordu-yi hümâyûn'a tevârüd eyledi.