Devlet-i 'aliyye-i ebediyyü'l-karâr'ın müttefiki olan Prusya Kralı'nın ‘arak-ı gayretini tahrîk ve i‘lân-ı harb ile o taraflardan Moskovlu'nun gûş-i nahvetlerini ta'rîk-i mekāsıdı ve i‘lân-ı sadâret-i mukaddemeleriyle taraf-ı [84a] Sadrıaʻzamî'den Prusya Kralı'na ve Baş-vekîli'ne birer mektûb tahrîrini erkân-ı Saltanat istihsân zımnında husûl-ı fâyide zikr ü beyân eylediklerine binâ'en, hâl-i mekâtib-i mezbûre tahrîr ve Serdâr-ı ekrem tarafından bir âdem ile el-yevm kürsî-yi memleket-i Prusya olan Perlin'de mukīm ‘Azmî Efendi tarafına gönderilüp, vâsıtasıyla tebliğ olunmak tarafına tenbîh olunduğundan gayri, işbu evvel behâr-ı huceste-âsârda Prusyalu ber-muktezâ-yı şurût-ı ittifak Moskovlu ile muhârebe edecek mi, yoğise ‘âmm-ı mâzî gibi tesvîfât-ı mevhûme ve mugāletât-ı maʻlûme ile ifâte-i vakt-ı fursat mı edecek taʻyîn olunun şahsı o vakitlere dek hakîmâne tevkīf vü ta‘vîk ve i‘mâl-i fikr-i ‘amîk ile keyfiyyeti lede't-tahkīk merkūmu iʻâde etmek husûsları Efendi-yi mûmâ ileyhe mahfice tahrîr ü tenmîk olundu.