"Küllüküm râʻin ve küllüküm mes’ûlün ‘an-raʻiyyetihî" fehvâsı üzere mâlik-i zimâm-ı enâm ve hükümrân-ı hâss u ‘âmm olanlara dâyimâ ehl-i fisk u fücûru men' ü tahzîr ve kavlen ve fiʻlen o makūle 'usât-ı ümmeti semt-i salâha tergīb ile tehdîd ü tenzîr lâzıme-i himmet-i erbâb-ı diyânet ve bu bâbda igmâz u tekâsül mûceb-i mu'âheze-i Rabb ve belki bâʻis-i zuhûr-ı gazab olduğunu Sadrıaʻzam tahkīk ü cezm ve mu'asker-i İslâm'da 'ibâdet ü tâʻatin icrâsı ve fısk u habâsetin imhâk u imhâsı bi-fazlillâhi Teâlâ sebeb-i husûl-i feth ü nusret ve bâʻîs-i fevz ü ganîmet olacağın derk ü fehm edüp, fi'l-hâl her fırkanın ru'esâsına fermânlar tahrîr ve bâʻis-i tekevvün-i mekârih-i hevâdis olan ümmü'l-habâyis tenâvülünden erbâb-ı gavâyit men' olunduğundan fazla, Şumnu'da hafi vü celî her kadar mey-kede ve mazânn-ı töhmet olur mahaller var ise sedd ü bend olunup, beyʻ ü tenâvülü ve te‘âtî vü te‘âmülü ancak reʻâyâ ve ehl-i zimmete münhasır olmak ve ricâl-i devlet ve ocağlu ve ketebe ve sâyir ehl-i hirfet dâyirelerinde mevcûd gılmân-ı nev-sâle ve taze-rûyân-ı müşgîn-i külâle ki, istihdâmları bâʻis-i isnâd-ı âsâm ve iftitân-ı ehl-i hevâ vü ‘avâmdır, Ordu-yi hümâyûn tard u tecnîb ve ‘adem-i tenebbüh ile imtisâl-i emr-i ‘âlî etmeyenler tertîb-i cezâ vaʻîd-i şedîdiyle terhîb olundu.