Ordu-yi hümâyûn'da Çavuş-başı Vekîli olan Berber-başı Mustafâ Ağa ve Baş-bâkī Kulu Haffâf-zâde Ahmed Ağa ve Teşrîfâtî Mehmed Na‘îm Efendi'nin birer mahalle taʻyîn ü ibʻâdı Şehriyâr-ı vâlâ-nejâd'ın murâdı olduğuna binâ'en, bi'l-fi'l Çavuş-başılık, mutasarrıf-ı sabıkı olup, Ruscuk taraflarına me'mûr olup olan Genc 'Osmân Ağa'ya ve vekâleti, Tezkire-i Evvel Enverî Efendi'ye, Teşrifâtcılık, Sadrıaʻzam'ın Vidin Serʻaskerliği'nde Kethudâsı olan el-Hâc Mustafâ Efendi'ye yevm-i mezkûrda tevcîh olunup, Berber Mustafâ Ağa Eflak cânibi Ser‘askeri Vezîr Mahmûd Paşa ordusuna mükârî vü araba ve Sârbân-başılık ‘unvânıyla me'mûr ve Sadr-ı esbak müteveffâ Cezayirli Hasan Paşa Hazînedârı Süleymân Ağa müşârun ileyh ordusuna Kassâb-başı nasb olunup, sâbık Teşrîfâtî, Nîş Mübâyaʻacılığı ile kurb-ı Devlet'den mehcûr ve Ser‘asker-i müşârun ileyhin ordusuna nâzır ve Defterdar olmak üzere bundan akdem Ordu-yi hümâyûn'da Defterdâr-ı Şıkk-ı Evvel olup, Babadağı cânibinde olan Râyik 'Ali Efendi'ye egerçi irsâl-i menşûr kılınmışidi. Ancak miyânelerinde vukū bulan münâfese hasebiyle imtizâcları emr-i ‘asîr ve bir nevʻ hatar vukūʻu dahi vârid-i zamîr olduğunu efendi-yi mûmâ ileyh tahrîr edüp, mülâhaza-i mezkûre her ne kadar vâhî ise dahi kāle geldiğinden iltimâsına müsâʻade ve işbu Receb-i şerîf'in yigirmi yedinci günü meʼmûriyyet-i merkūme efendi-yi mûmâ ileyhden sarf ve hâlâ [83b] Tevkīʻî olan Doğramacı-zâde ‘Abdullah Efendi'ye ‘atf olunup, Haffâf-oğlu dahi mukaddemâ Kaligra taraflarına taʻyîn olunmuş olmağla, bu vesîle ile hakkında emr-i teb'îd zımnen tecdîd ü te'kîd olundu.