Bir müddetden berü nehr-i Tuna üzerine kā'ide-i Devlet üzere cisr binâ olunmayup, ‘azîmet ü ‘avdetde ‘askerî tâyifesi zahmet-keş top ve mühimmât naklinde me'mûrların hâli müşevveş olur idi. Bu sâl-i hûceste-fâlde inşâ-yı cisre irâde-i hümâyûn te'alluk edüp, Pepekî Hasan Efendi'nin ikdâm u nüfûzu nümâyân ve bu hıdmetin 'uhdesinden geleceği ma'lûm-ı Sahib-kıran-ı zemân olduğundan me'mûriyyeti tasrîh ve Haziran evâyilinde vücûda gelmesi telmîh olunup, lâzım gelan mesârifi ceste ceste taraf-1 mîrîden itâ olunmak üzere nizâm verilüp, kerâste ihzâriyçün mübâşirler taʻyîn ve taraf taraf eczâ-yı cisrin ihzârına mübâşeret ile icrâ-yı emr-i Şehriyâr-ı bâhirü't-temkîn kılındı. Aʻdâ-yı dînin Tuna'da vâfir gemileri olup, Devlet-i ‘aliyye'nin sefâyini ekall-i kalîl ve mukāvemete kâfî olmadığı [83a] vâreste-i delil olup, lede'l-hâce istihdâm içün sevâhil-i Tuna'da vaki' Niğbolu ve Ruscuk ve Silistre ve Vidin iskelelerinde kırk elli kadar sefînenin inşa olunması irâde ve mesârifleri mîrîden verilmek üzere sâdır olan evâmir, mübâşirler ile mahâll-i mezkûreye firistâde olundu.