Mûmâ ileyhin muktezâ-yı kāmeti olan şûriş ü gavgāya temâyülü ve eʻâzım-ı nâs ile ülfet ü muvânesetde tekâsülü ve erbâb-ı maslahatın rü'yet-i umûrlarında olan nihânî teʻâmülü sükut-ı iʻtibârına sebeb-i müstakill ve bu esbâb ile münʻazil olup, Büyük Tezkireci Vekîli olan Râsih Mustafâ Efendi mûmâ ileyhe câ-nişîn ü vekâlet-i merkūme ile Küçük Tezkireci bulunan ‘Arif Efendi kâm-bîn ve Küçük Tezkirecilik ile Tosun [82b] Efendi tarâvet-dih-i hâtır-ı gam-gîn oldu. Segbân-başı olan Ebû'ş-Şevârib Mustafa Ağa'nın men‘-i sükkârı ve zabt-ı eşkıyâda rehâvet üzere olduğu ve kezâlik Bostâncı-başı Bekir Ağa'nın zulm ü gadre dâyir harekâtı tecâsür eylediği maʻlûm-ı Şehriyâr-ı ‘adâlet-menâkıb oldukda, Segbân-başı ‘azl ile te’dîb ve Bostâncı-başı Kıbrıs'a nefy ü tagrîb olunup, Hasekî Ağa mansıb-ı mezkûr ile tatrîb olundu. Donanma-yi hümâyûn'un Bahr-i siyâh'a ihrâcı zemânı hulûl edüp, vakt-i muhtârda icrâ-yı merâsim-i mu‘tâde olunup, Kapudan Paşa müstaʻînen bi'l-Meliki'l-Aʻlâ mikzâf-cünbân-ı ‘azîmet ve icrâ-yı meʼmûriyyete şitâb u sürʻat eyledi. Halîc-i Bahr-ı Siyah muhafazasına bir vezîrin taʻyîn olunması Âsitâne ve orduda münʻakid olan meclis-i şûrâda tasvîb ve Mora Vâlîsi Vezîr es-Seyyid Ahmed Paşa bu hıdmete takrîb olunup, müşârun ileyh berren vasıl-ı Âsitâne-i saʻâdet'e ve Beykoz sahrâsında hayme-nişîn-i ikāmet oldu.