Ba‘zı erbâb-ı vukūf der ki Şerîf Hasan Paşa Selanik'de ikāmete me’mûr iken Keçeci-zâde Mehmed Sâlih Efendi Kadı bulunup, müşârun ileyh tarh-ı külfet-i ülfet ve ‘akd u râbıta-i ünsiyyet edüp, Cezayirli Hasan Paşa vefât eyledikde Efendi-yi mümâ ileyh ba‘zı mehâfil-i hatîrde Şerîf Hasan Paşa'yı medh ü senâ ile ta'rîf ve müşârun ileyh leyyinü'l-cânib ve taşrada terbiye olunmuş bir vezir olmağla savlet-i kahramânîsindan hass u ‘âmm sâlim olur ihtimâli hâtıra âyib olup, Sadâret-i ‘uzmâ'ya liyâkatı ve Serdar-ı ‘asker mansûr olmağla, vücûd-ı kudreti takrîr olunarak nezd-i ferd-i Mülûkâne'de tavsîf Cezayirli'ye tahlîf olunmuşidi. Müşârun ileyhin sadâreti hengâmında vukū‘ bulan mecâlis-i şûrâda Devlet-i ‘aliyye'ye irâde-i hayr ile zebân-âver-i beyân olduğu tedbîr [79b] muvâfık takdîr olmayup, müstenidinin dahi ‘adem-i muvaffakiyet ile necm-i ikbâli giriftâr-ı ‘ukde-i vebâl ve bed-reftârı dûçâr-ı mahâk-ı zevâl olup, nuhûset ü idbârı bi-hasebü'l-iktirân Efendi-yi mûmâ ileyhe sirâyet ve kevkeb ü sa‘âdeti ric'at edüp, sâdır olan hatt-ı şerîf mûcebince işbu Cumâdelâhıre'nin yigirmi üçüncü günü maskat-ı re’si olan Konya'ya nefy ü tagrîb ile ta‘zîr ü te'dîb olundu. Bu sebeble Ordu Kadılığı münhall olup, Âsitâne-i sa‘âdet'den biri tahsîs olunduğu hâlde külfet-i mutâlebât derkâr ve Ziştovi mükâlemesinde Murahhas-ı Sânî olan ‘İsmet Bey efendi ihtiyâr-kerde-i uli'l-ebsâr olmağla mîr-i mûmâ ileyhe Ordu Kadılığı ihâle vü tevfîz ve me’mûriyyet-i uhrâsı takrîbi ile idâre-i umûr-ı şer'iyyeye nâ'ibi ta‘vîz olundu.