Şerîf Hasan Paşa gāyilesi bertaraf oldukdan sonra, vakt ü hâle [77b] münasib bir vezîrin makām-ı Sadâret'e mütekārib olması zımnında idâre-i pergâr-ı efkâr olunup, mukarrebân-ı Saltanat taraflarından Boğaz Serʻaskeri Vezîr ‘İzzet Mehmed Paşa sevk ü taʻrîf olunmağla, müşârun ileyhin ‘akl u dirâyeti müsellem ise dahi meydân-ı kar-zâr ve idare-i umûr-ı esfârda tecribesi sebkat etmediğinden, mizâc-ı ilhâm-ı imtizâc-1 hazret-i Hilafet-penâhî'ye muvâfık gelmeyüp, Âsitâne-i sa‘âdet'de kâîn ‘arbede-cûyân-ı 'asr ve sadakat-kârân-ı dehrin bazıları dahi Sadaret'e takrîben zebân-aver-i tezkâr ve fi'l-cümle icâbet ü temâyül bedîdâr olmuşiken, istiklâl-i tamm irâdesiyle baʻzı şürût îrâd olunup, îfâsı temâmca nüfûz-ı Devlet âhare tahvîl etmek mazarratını iktizâ ve Sâhib-kırân-ı zemân hazretlerinin nefs-i zekiyyesi mahkûm olmak ‘ârizasından istiğnâ göstermekle karîha-i sabîha-i Mülûkâneleri'nden mühr-i hümâyûn Bosna Vâlîsi Sadr-ı esbak Yûsuf Paşa tarafına irsâl ve Mîrâhûr-ı sânî olan Hüseyin Ağa Şumnu'dan bu hıdmete me'mûriyyetle matıyye-rân-ı isti‘câl ve taraf-dârân-ı sâyire perde-ber-endâz-ı zuhûr olan nakş-ı garîbden engüşt-hâ-yi fikr ü hayâl oldular. Vakt-i rezm ü ceng teng ve Bosna Şumnu'ya kırk elli ferseng olup, bir ân akdem meştâ-yı Ordu-yi hümâyûn'a vusûlü içün tarafına hatt-ı şerîf tesyîr ve mazmûn-ı bedâyi‘-i makrûnunda selefinin tebaʻât-ı sâbıkası tezkîr olunup, vaktiyle tanzîm-i umûr-ı Devlet ve tensîk-i mehâmm-ı muhârebe vü mukāraʻat eylemesi derc ü tastîr olundu. Mavsıl hatt-ı hümâyûn Bosna'ya duhûlü günü müşârun ileyhe vâsıl olup, sebük-bâr-ı mevkib-i hümâyûna doğru ‘inân-tâb-ı îlgār ve Cumâdelâhıre'nin yirmi üçüncü günü Şumnu'ya duhûl ile kâr-sâz-ı Devlet-i ebed-karâr oldu.