Kethudâ-yı Sadr-ı ‘alî olan es-Seyyid Feyzullah Efendi vakt ü zemânıyla Sadrıaʻzam'ı Babadağı semtine teşvîk ve baʻzı sâde-dilân-ı rüzgâr: "Dobruca ehâlîsi bizi yağma vü talan eder" kavl-i gayr-i müveccehi ile Sadrıaʻzam'ı [73a] tevhîn ve mevkib-i hümâyûnu ta‘vîk etmişidi. Mûmâ ileyh ‘âkil u fatîn ve sadâkat-kâr-ı Devlet-i ebed-karîn olup, me'mûr olduğu hidemât-ı seniyyenin cümlesinde memdûh ve mûris-i şeyn olur hareket ile beyne'n-nâs gayr-i makdûh olduğu bî-garaz ve ehl-i insâf olan zevât ‘indinde hayyiz-resân-ı vuzûh iken "Fî kulûbihim marazun" olan baʻzı ehl-i garaz mûmâ ileyhi nisâl-i nifâk u siʻâyetine amâc u garaz edüp, hakkında cebîn-i lâmi‘ü'n-nûr-ı Şâhâne'yi perçîn-i gazab ve bâre-i ‘âcizânesinde olan hüsn-i zann-ı Mülûkâne'yi tagyîre sebeb olduklarına binâ’en, ‘azl ü nefyine irâde-i hümâyûn te‘alluk edüp, işbu Rebîʻulâhır evâsıtında Kıbrıs Cezîresi'ne neyf ü iclâ ve bu vesîle ile erbâb-ı hıkd u kîn gayz-ı nihânîlerin istîfâ eylediler. Nazm: Mâye-dârân olamaz reste-nifâk-ı hâsed, / Nahl-1 bâr-âver olur zahm-hûr-ı seng-i kazâ. Sadrıa‘zam Kethudâlığı içün hılâl-i râhda Hakkı Beyefendi'ye hatt-ı hümâyûn îsâl olunup, Kozluca'da Sadrıa‘zam'a mülâkī ve ibrâz-ı hatt-ı menâyih-nutk ‘akabinde Kethudâlık mesned-i refî‘ne râkī, bu sebeble hall-i İlâhî zuhûr edüp, Riyâset Vekâleti Firdevsî Efendi'ye ve Rûz-nâmçe-i Evvel Murahhas-ı Sâlis olan Dürrî Efendi'ye ve Mektûbculuk Baş-halîfe Sâdık Efendi'ye tevcîh olundu.