‘Adüvv-i dîn olan Moskovlu bundan akdem Kili Kal‘ası'nı vîre ile alup, kilîd-i nehr-i Tuna olan Sünne Boğazı'nı dahi zabt ve İsmâ‘îl ile Tolçi miyânında vâki‘ adaya ‘asker sevk ve berren ve nehren İsmâ‘îl Kal‘ası'nı tazyîk eylediğinden gayri Tolçi'ye dahi müstevlî ve el-hâletü hazihî toprak tabyalar ihdâsıyla istihkâmına şürû‘ ve giderek berü taraflara hücûm eyleyeceği mesmûʻ olmağla, Balkān'ın öte tarafları mütezelzil ve meştâ 'askeri henüz ihtişâd etmeyüp, düşmen zuhûrunda mevcûd ile cevâb vermek müşkil olup, Prusyalu ile ‘akd olunan ittifaka halel târî olmaksızın bir müddet mütâreke nâmıyla a‘dâyı igfâl ve hücûm u hareket dâ‘îyelerin ibtâl etmek ve mütârekenin [71b] Ordu-yi hümâyûn'da esbâb-ı tanzîmi ma‘dûm olmağla, Âsitâne'de çâresi bulunmak ve zehâyir ü ‘asâkirin kılletinden bahs ile istikmâl-i esbâb-ı 'âdiyeye dikkat olunmak husûslarını lisânen ifâde zımnında işbu Rebîʻulevvel evâsıtında Ordu-yi hümâyûn'da Re'îsülküttâb Vekîli olan Hakkı Mehmed Beyefendi Asitâne-i saʻâdet'e vârid olup, hâmil olduğu tahrîrât ve kûze-i hâfızasına îdâʻ olunan keyfiyyât mübarek rikâb-ı müstetâba 'arz olundukda, Re'îs vekîlinin Âsitâne'ye gelmesi tevlîd-i erâcîf eyleyeceğinden başka bu mevsimlerde hudûd-ı İslâmiyye'nin 'askerden hulüvvünü aʻdâ-yı dîn bi't-tecribe bilüp, memâlik-i mahrûseye taraf taraf hücûm 'amelinde iken bu tarafdan mütârekeye meyl ü rağbeti kemâl-i ‘acz ü zarûrete haml ile sûret-i istignâ göstereceği ve yâhûd müddet-i mütârekeyi ekall-i kalîl vakt ü zemâna hasr ve müddet-i mahsûre miyânında mükâleme ve belki tekmîl-i mevâdd, müsâleme içün müstakilen sened taleb eyleyeceği vâridât-ı hâtırdan olup, bâyin-cümle Prusya Devleti'yle bilâ-muhâbere mütârekeye şürû şart-ı ittifakı ber-hemzede-i nakz u habt ve muhabere vü istimzâc ise, imtidâd-ı vakt ü zemânı müstelzim ve ‘alâ-külli-hâl esbâb-ı mütâreke bu tarafda münʻadim olup, Ordu-yi hümâyûn'da ihtilâs-1 vakt ve igfâl-i hasm müstehıkkü'l-makt zımnında: "İttifaka halel gelmeksizin sûret-i mütârekenin imkânı bulunur ise câyiz görülür" deyü taraf-ı vâzıhu'ş-şeref-i Mülûkâne'den Sadr-ı vâlâ-kadr tarafına egerçi tenbîh olunup, ancak aʻdânın gurûr u istikbârı maʻlûm ve tazyî‘-i vakt-i fursat etmeyeceği meczûm olup, irâde-i Devlet-i ‘aliyye üzere mütârekeyi kabûl etmamek ihtimâlâtı dahi derkâr olmağla, binâ'en-‘alâ-zâlik meştâ ‘askerinin bir ân akdem Ordu-yi hümâyûn'a iltihâkçün Kapucular Kethudâsı ve Mîrâhûr-ı Sânî ve [72a] Vekîli ‘Abdî Bey Rumeli taraflarına hutût-ı hümâyûn ile müveşşah evâmir-i ‘aliyye ile ihrâc ve Hakkı Bey dahi zâtına müteʻallik baʻzı mübeşşirât ile Ordu-yi hümâyûn'a i‘âde vü idlâc olundu.