Ordu-yi hümâyûn tarafından Kili Kalʻası imdâdına gönderilan ʻaskerin bir mikdârı Tolçi'de ve bir mikdârı İsmâʻîl'de kalup, ehâlî-yi Kili bu sebeble imdâd u iʻânetden mahrûm ve bi'z-zarûre kalʻayı düşmene teslîm eyledikleri maʻlûm ve bundan sonra aʻdâ-yı dînin kasdı İsmâ‘îl Kasabası olduğu emr-i meczûm olup, derûnunda olan 'asâkir ü zehâyir vâfî u vafîr ise dahi Serʻaskeri olan Aydoslu Mehmed Paşa'nın tedbîrât u tasarrufâtı bâtıl ve evzâ‘ vü harekâtı hilye-i savabdan ‘atıl olup, bir müddetden berü müşârun ileyhin tebdîlini Serdâr-ı ekrem irâde ve cânişîn olacak vüzerâdan birini bulamadığından yevmen-fe-yevmen efkâr u ekdârı ziyâde olup, İsmaʻîl Muhafızı Mehmed Paşa'da mahayil-i rüşdü isti‘dâd meşhûd ve vezârete ve belki Serʻaskerliğe liyâkat ü istihkāk, mevcûd olduğuna binâ'en, bâdî-yi emrde rütbe-i vâlâ-yı Vezâret ile kadri i'lâ ve baʻdehû Ser askerlik tefvîzi ile mekālîd-i sunûf-1 'askerî yedine i‘tâ olunmak zebân-güzâr-ı ehl-i şûrâ olunmağla, müşârun ileyhe vezâret ihsân olunduğundan fazla Sadrıaʻzam'ın Vidin taraflarında iken Kethudâlık hıdmetleriyle dem-güzâr ve muhârebenin birinde giriftâr-ı kayd-1 isâr ve mütâreke vukūʻnda Nemçelü tarafından [69a] sebîli tahliye olunup, mükâfâten zümre-i hâcegâna ilhâk ile karîn-i istibşâr olan Mehmed Emîn Efendi ki, Üsküdar'da Zaʻîm-oğlu demekle meşhûr ve münâdeme-i nâsdan ‘urûz-ı fütûr ile İçağalık hirfetine mecbûr ve baʻzı vüzerâ dâyirelerinde Enderûn Baş-çavuşluğu ile manzûr olmuşidi. Mûmâ ileyhe dahi defʻaten Tırhala Sancağı izâfesiyle vezâret verilüp, Tolçi'ye taʻyîn ü irsâl ve İsmaʻîl'de mütehazzib olan cünûd-1 Muvahhidîn ile bi'l-muhâbere muktezâyât-ı vakt vü hâli kuvvetden fiʻle îsâl eylemesi bi'l-müşâfehe tenbîh ve hareketinde isti‘câl ve Mikdâd Paşa ve Cereoğlu'nun bulundukları mahallerde zulm ü teʻaddîden gayri, ellerinden bir şey gelmediğine binâʼen, vezâretleri merfûʻ birer mahalle ‘ale't-tarîki'n-nefy medfû kılındıklarından gayri, Karahisârî Ahmed Paşa Kili'ye 'adem-i i'ânet Tolçi'de müddet-i medîde meks ü ikāmet ile hâyiz-i gımâr-ı taksîr ü töhmet olmağla, müşârun ileyhin dahi rütbe-i vezâreti ilgā, İstanköy Cezîresi'ne nefy ü iclâ, Karvan ve 'Abdî Paşa Tabiyesi ve Kara Harmen ve İsakçı taraflarının mehmâ-emken lâzıme-i takviyetleri icrâ ve Tolçi etrâfında mukīm olan Kuban Hânı Baht Girây Hân'a dahi o havâlînin muhafaza vü vikāyesi bâbında müte‘addid evâmir-i ‘aliyye ısdâr u isrâ olundu.