Nemçe murahhasları ve İngiltere ve Felemenk mutavassıtları Beç Şehri'nden çıkup, müteveccih-i canîb-i maksûd oldukları peyâmı, Ordu-yi hümâyûn'a vürûd etmekden nâşî, Devlet-i ʻaliyye murahhaslarının dahi bir ân akdem Ziştovi tarafına ʻazîmetleri lâzım gelmekle, binâ’en-ʻalâ-zâlik işbu Saferü'l-hayr'ın yirmi beşinci günü Murahhas-ı Evvel ve Sânî'nin birer esb-i [68b] müzeyyen ile şânları tevfîr ve hilaʻ-i hazret-i Pâdişâhî ve imtiyâzât u ʻavâtıf-ı nâ-mütenâhî ile esbâb-ı ihtişâm u ʻunvânları tevfîr ve hemân yevm-i mezkûrda mahall-i mükâleme olan Ziştovi Kasabası'na tesyîr ve bu mülâbese ile Riyâset Vekâleti'nin idâresine ricâl-i devletden birinin tahsîsi muktezâ olmağla hâlâ Defter Emîni olan Hakkı el-Hâc Mehmed Hakkı Beyefendi'ye hıdmet-i vekâlet tefvîz ü ihâle ve Dürrî Efendi'nin mutasarrıf olduğu Mektûbçuluk hidmeti vekâleti dahi Tezkire-i Sânî olan Firdevsî Efendi'ye tevcîh olunup, tasdîk-i mesel-i "Diğsün ʻalâ ibbâleh" kılındı.